Analisis: Aruba a drenta un fase peligroso cu no por wordo ignora mas: PARTI 1

Scirbi pa Tito Laclé

E asesinato brutal di e hoben di 17 aña den Palm Beach den fin di siman no ta solamente otro caso criminal. E ta un señal cla cu Aruba ta drenta un fase social hopi mas serio cu hopi hende kier acepta. Y loke ta haci esaki mas alarmante ainda, ta cu e no a sosode den un barrio r of un caminda aleha. E la sosode den centro di nos vitrina economico: nos zona hotelero. Y ey ta unda e berdadero preocupacion ta cuminza.

NORMALISACION DI VIOLENCIA

Bo lo pensa corectamente, ora bo bisa cu cierto palabranan a bira “custumber”. Palabranan manera “Hoben den su flor di hubentud”, “isla den shock”, “acto criminal”, “reglamento di cuenta”, “pandiya”. Tur e expresionnan aki ta cuminza perde peso, pasobra nos ta tende nan demasiado frecuente. Y ey tin un peligro grandi: normalisacion.

Ora un sociedad cuminza acustumbra cu asesinato di hobenan, algo ta profundamente malo.

AUMENTO DI CASO

Prome tabata un caso excepcional. Despues dos. Awor casi tur aña tin un caso cu ta conmociona Aruba pa varios dia, pa despues tur cos bolbe na “business as usual”. E rabia publico ta dura poco. E preocupacion politico ta keda na declaracionan politico. Y e famianan afecta ta keda nan so cu nan duelo eterno. Esaki no ta solamente un problema di polis. E ta un fracaso social colectivo.

E EDAD TA SIGUI BAHA

Un punto sumamente alarmante ta cu e edad di involucradonan ta sigui baha. Aruba semper tabatin delicuencia hubenil, pero awor nos ta mira acceso mas rapido na arma, mas violencia extremo, y un cultura di “respet” y “reputacion” cu ta bira mortal.

REDNAN SOCIAL TA AGREGA GASOLIN RIBA E CANDELA 

Conflictanan cu prome lo termina ‘solamente’ cu un pelea, awor ta wordo amplifica online. Humiyacion publico, provocacion,  menazas, “live videos”, musica cu glorificacion di bida di pandiya, y e necesidad constante di mustra “dureza” pa gana respeto. Tur esaki ta crea un cocktail peligroso den mente di hobenan cu ainda no tin madurez emocional completo. Y infelizmente, Aruba no ta aisla di e influencia global aki.

GANG: UN REALIDAD CU HOPI NO KIER ACEPTA

Pa hopi aña Aruba a gusta bisa: “Nos no tin gangnan manera Merca.” Pero realidad ta mustra algo diferente. Talbes no den mesun escala, pero cierto grupo di hoben ta opera cu mentalidad di gang: territorio, rivalidad, retaliacion, intimidacion, y lealtad di grupo. Y ora arma di candela drenta den e ecuacion, e situacion ta bira hopi mas serio.

Lo mas peligroso ta cu Aruba ta chikito. Esey kiermen cu rivalidadnan no ta keda limita na un bario. Tur hende ta conecta cu otro. Tur hende conoce otro. Y un conflicto personal por escala rapidamente,  specialmente riba un isla unda rumor y reputacion ta corre mas rapido cu verdade.

TURISMO: E IMPACTO CU NO TUR HENDE TA KIER PAPIA DI DJE

Awor ta bin e punto economico. E hecho cu esaki a sosode na Palm Beach ta cambia e gravedad di e caso completamente. Pasobra Aruba no ta bende solamente solo y beach. Aruba ta bende “siguridad”. E perception internacional di Aruba semper tabata: “Safe Caribbean destination.” E turista ta paga mas pa Aruba hustamente pasobra nan ta sinti nan mes sigur. Famianan ta bin Aruba pasobra nan no ta spera violencia den area hotelero. Pero imagina un turista cu mira polis, cinta di crime scene, ambulance, panico, y noticia di asesinato den parkinglot di un zona hotelero. Y awor cu TikTok, Facebook, Instagram y X ta move informacion den segundos, e daño reputacional ta bira inmediato.  Un solo video viral por haci mas daño cu un campaña di marketing di miyones.

DESTRUI ARUBA?

Naturalmente, un incidente no lo destrui turismo di Aruba inmediatamente. Tur caminda tin violencia y sigur di unda cu e turista ta bin, tambe tin su ‘fair share’ di crimen. Pues, e turista no ta imun pa esaki. Sinembargo esaki no mester papia e acto na Aruba bon. Aki ta papia di CONFIANSA!. Si violencia cuminza bira recurrente y visible den area turistico, e confianza internacional por cuminza afloha poco poco. Y turismo ta nos unico pilar economico fuerte. Esey kiermen cu seguridad no ta solamente un asunto policial. E ta un asunto economico nacional. Mayan, den parti 2, ta elabora riba con por of kico mester haci pa ‘remedia’ esaki, si esey ta posibel anto.