Dowers: Corte a confirma autoridad di gobierno contra e-stepnan ilegal

ORANJESTAD – Minister di Husticia, Arthur Dowers, ta bisa cu e reciente sentencia di Corte a confirma cu Gobierno di Aruba tin autoridad pa actua contra uzo ilegal di e-stepnan y bicicleta electrico riba camindanan publico, siempre cu e procedimentonan administrativo estipula den ley ta wordo sigui.

Segun Dowers, Corte a duna claridad tocante e manera cu accionnan di handhaving mester wordo ehecuta. E decision hudicial ta relaciona cu e prohibicion di e-stepnan y bicicleta electrico den espacionan publico, cual ministerio a anuncia algun siman atras.

Den su reaccion, Dowers a enfatisa cu Corte no a pone limitacion riba autoridad di gobierno pa controla y actua contra infraccionnan. Segun e minister, e sentencia simplemente ta confirma cu accionnan administrativo mester sigui e proseso legal correcto.

Dowers tambe a aclara cu e vehiculonan nunca a wordo tuma “in beslag”, sino “in bewaring”, y cu despues nan a wordo entrega bek na e respectivo doñonan una vez cu nan a presenta nan mes.

Minister di Husticia a indica cu gobierno por sigui impone medida administrativo manera boetnan y sancionnan financiero den caso di incumplimento di ley. Segun Dowers, proteccion di comunidad y seguridad riba caminda publico ta sigui prioridad principal den maneho di transporte alternativo na Aruba.