Minister Wever y Parlamentario Wever-Croes den choke tocante debe y surplus

ORANJESTAD – Un discusion politico cayente a explota entre Minister di Finansa, Geoffrey Wever, y miembro di Parlamento Evelyn Wever-Croes, despues cu Gobierno di Aruba a anuncia cu a logra un fiansa di 160 miyon dollar riba mercado internacional. Mientras gobierno ta presenta e operacion como un logro historico pa refinancia debe riba condicionnan favorable, oposicion ta cuestiona con tin surplus y aun asina Aruba mester sigui fia placa.

Den su comunicado oficial, Minister Geoffrey Wever a subraya cu e fiansa aki “no ta un debe nobo”, sino un refinanciamento di debenan cu tawata caduca e aña aki. Segun e minister, e nivel di debe nacional no lo subi y tampoco e costo di interes. Wever a enfatisa cu Aruba a logra e nivel di “country risk” mas abou den historia di e pais, algo cu segun e ta confirma cu confianza internacional den economia di Aruba a fortalece significativamente.

REACCION

Pero e declaracion no a pasa sin critica. Parlamentario Evelyn Wever-Croes a reacciona fuertemente via social media, cuestionando con un gobierno cu ta papia di surplus financiero por anuncia mas fiansa cu tanto orguyo. “Nos tin surplus y cu orguyo e minister aki ta anuncia mas debe??? Really??? Anto e kier pa bo ta contento tambe,” Wever-Croes a comenta. E reaccion ey a provoca un contraataque politico di Minister Geoffrey Wever, kende a acusa e ex prome minister di “mal informa pueblo” tocante funcionamiento basico di refinanciamento gubernamental. Segun Geoffrey Wever, Evelyn Wever-Croes conoce perfectamente cu Aruba, aun cu tin surplus, mester refinancia parti di su debenan tur aña, pasobra e surplus no ta suficiente pa cubri tur obligacionnan cu ta caduca.

Minister Wever a splica cu den Presupuesto 2026 — cu Parlamento mes a aproba — ta claramente stipula cu Aruba mester repaga alrededor di 648 miyon florin na debenan di pasado. Di e cantidad ey, solamente 121 miyon lo wordo cubri cu fondo propio, mientras cu e resto lo mester wordo refinancia riba mercado di capital. “No ta trata di un debe nobo,” e minister a enfatisa. “Ta un prestamo pa repaga un prestamo di mas di 10 aña pasa.” Segun Geoffrey Wever, e proceso aki ta identico cu loke tambe tabata wordo haci durante gabinete di Evelyn Wever-Croes mes. E minister a laga claro cu, den su opinion, e parlamentario ta creando confusion den pueblo pa motibonan politico. Pero Evelyn Wever-Croes no a laga e acusacion pasa sin reacciona. Den un segundo mensahe publico, e ex prome minister a post cu e minister no por culpa oposicion pa falta di comunicacion. “Mi a forse pa duna informacion,” Wever-Croes a declara. “E responsabilidad pa informa pueblo no ta cerca mi mas, e ta serca bo.”

E parlamentario tambe a amplia su critica mas leu di e fiansa di 160 miyon dollar. Segun e, gobierno ainda no a duna suficiente aclaracion riba varios asunto importante, incluyendo unda 18 miyon florin destina pa asfaltamento di careteranan a bai, e ausencia di debatenan tocante HOFA den Parlamento, y falta di un plan concreto pa diversifica economia di Aruba.

Ademas, Wever-Croes a menciona cu ainda no a ricibi informacion tocante gasto di un private jet relaciona cu un colega ministerial, algo cu segun  e ainda ta pendiente di aclaracion.

E confrontacion entre Geoffrey Wever y Evelyn Wever-Croes ta pone un bez mas na cla e tension politico creciente tocante maneho financiero di Aruba. Mientras Gobierno ta argumenta cu refinanciamento ta practica normal y necesario pa mantene stabilidad financiero, oposicion ta pinta un cuadro di falta di transparencia y ta cuestiona unda e beneficio di surplusnan reciente realmente a bai. NOTA: E potret ta un dramatisacion di e dos personanan cu ta menciona den e articulo.