Gobierno ta cuminsa cu proyecto historico pa defini pobresa na Aruba

ORANJESTAD – Gobierno di Aruba oficialmente a cuminsa cu un proyecto historico pa determina oficialmente kiko ta e linea di pobresa na Aruba y pa crea un sistema estructural pa midi poder di compra di ciudadano y famianan.

Minister di Finansa Geoffrey Wever, hunto cu minister Melvin Wyatt-Ras y prome minister Mike Eman, a lansa e iniciativa cu lo wordo ehecuta bao liderazgo di CBS Aruba y cu apoyo tecnico y financiero di Hulanda.

E proyecto lo enfoca riba defini oficialmente kiko ta pobresa na Aruba, crea un metodo pa midi pobresa y poder di compra periodicamente, y incorpora esaki structuralmente den CBS Aruba. Hulanda a pone aproximadamente USD 340.000 disponibel pa e proyecto y un experto di CBS Hulanda lo asisti Aruba durante un aña.

Segun minister Wever, e meta principal ta pa duna gobierno informacion mas concreto y confiabel pa crea maneho economico y social cu ta enfoca especificamente riba e gruponan mas vulnerabel den comunidad.

Gobierno ta spera finalisa e proyecto na 2027. Ora esaki ta cla, Aruba pa prome biaha lo tin un sistema oficial y permanente pa monitorea pobresa y e desaroyo di poder di compra na isla.