Amadee Nicolaas ta conkista historico Ronde van Aruba 2026 den edición record cu 813 corredor

SAVANETA – E di 34 edición di Ronde van Aruba 2026 oficialmente a drenta historia como e edición mas grandi di tur tempo, cu no menos cu 813 participante cu a acepta e reto agotador di 72 kilometer rond di Aruba. Y na final di e impresionante noche deportivo, e gran vencedor absoluto a bira corredor local Amadee Nicolaas.

Nicolaas, cu ta corre pa Alpha Runners, a cruza e meta como prome corredor den e categoria single runner, registrando un impresionante tempo di 6 ora, 28 minuut y 24 segundo, estableciendo tambe un  personal best nobo.

E evento, organiza pa Oficina di Deporte di Kazerne di Marina Savaneta, a reuni corredor for di Aruba, Hulanda y Inglatera. Aproximadamente 30 porciento di participante tabata militar, mientras cu e otro 70 porciento tabata corredor local y amante di deporte internacional.

Durante henter e trayecto di 72 kilometer, corredornan a enfrenta calor, cansancio y condicionnan exigente mientras cu comunidad rond di isla a sali pa brinda apoyo y aplauso na tur participante.

Segun Jeffrey Wassenburg, Hefe di Ofisina di Deporte na Kazèrne di Marina Savaneta, e cantidad record di participante ta confirma cu Ronde van Aruba ta sigui creciendo como uno di e eventonan deportivo mas importante y socialmente conecta na Aruba.

“E colaboracion entre militar, boluntario y comunidad Arubiano un biaha mas a resulta den un evento seguro y exitoso,” Wassenburg a declara.

E edición aki no solamente a mustra resistencia fisico y disciplina mental, pero tambe e enorme crecimiento di cultura deportivo na Aruba. Cu victoria dominante di Amadee Nicolaas, edición 2026 awor oficialmente ta grava den historia di deporte local como un di e mas memorable Ronde van Aruba di tur tempo.