Asteroide lo pasa hopi cerca di tera: “Casi imposible mas cerca sin impacta”

NEW YORK - Un   asteroide  grandi lo pasa awe anochi hopi cerca di tera. E piedra espacial lo pasa na mas cu 90 mil kilometer di altura for di nos planeta. Aunke esaki por parce leu, e distancia ta mas cerca cu e luna.

“Den termino astronomico, esaki ta asina cerca cu bo por yega sin impacta tera,” asina Mark Norris di University of Lancashire a declara na New Scientist.

E asteroide, cu a wordo descubri solamente un siman pasa, ta carga nomber 2026JH2 y cientificonan ta calcula cu e tin un diametro entre 16 y 36 meter. Su tamaño ta comparable cu aproximadamente dos te ocho autobus urbano coloca uno tras di otro. Segun Norris, “si e impacta tera, e por destrui un ciudad considerablemente.”

E asteroide lo pasa mas cerca di tera entre 11’or di anochi y mezanoche y lo por ta visible pa un periodo hopi corto for di hemisferio nort. Esaki pasobra e ta move cu un velocidad di mas cu 9 kilometer pa segundo. Nubia por dificulta visibilidad di e fenomeno.

Na 2013, un meteorito cu tamaño similar a explota den atmosfera cerca di ciudad ruso di Chelyabinsk. Mas cu 1.200 persona a resulta herida door di glas cu a bula den aire despues di e explosion. E impacto ey a libera aproximadamente 30 biaha mas energia kinetico cu bomba atomico di Hiroshima na 1945.