ARUBA DOET 2026 ta move Aruba: 135 proyecto ta cambia bario y comunidadnan

ORANJESTAD – Aruba awe a wordo move pa un ola grandi di solidaridad y accion comunitario cu apertura oficial di Aruba Doet 2026, e evento di boluntariado mas grandi di nos isla. For di Noord te San Nicolas, centenares di boluntario a baha riba caminda pa cuminsa cu entusiasmo e prome di dos dia dedica completamente na yuda y mehoracion di comunidad.

E apertura oficial a tuma luga den Seroe Patrishi, unda proyecto “Hunto pa Seroe Patrishi” a bira simbolo di cooperacion y compromiso comunitario. E iniciativa, cu ta reuni studiantenan di Universidad di Aruba, FCCA y CEDE Aruba, ta enfoca riba mehoracion di espacio recreativo den e bario.

Durante ceremonia, Gobernador di Aruba SE Alfonso Boekhoudt y Daniel Tecklenborg di CEDE Aruba a destaca importancia di boluntarismo y con trabou hunto por transforma comunidadnan y toca bida di hopi hende.

Awe mes, no menos cu 135 proyecto a drenta den fase di ehecucion. Na scolnan, fundacionnan, scouting y clubnan deportivo rond di isla, boluntarionan a pone man na trabou cu limpieza, pintura, mantencion y renovacion di diferente facilidadnan comunitario.

Atmosfera di union, energia y compromiso social tabata senti den tur skina di Aruba, confirmando cu ARUBA DOET no ta solamente un evento, pero un movimiento cu ta sigui uni comunidad Arubiano cada aña.