Aruba a firma LOI pa bira centro regional di sostenibilidad cu apoyo di Wageningen University

ORANJESTAD - Gobierno di Aruba den compania di prome minister hulandes Rob Jetten, a firma un “Letter of Intent” (LOI) cu Wageningen University & Research pa fortalece colaboracion den area di sostenibilidad, medio ambiente y seguridad alimentario. E acuerdo ta basa riba mas cu diez aña di cooperacion y ta forma parti di vision di gobierno pa posiciona Aruba como un centro regional di conocemento y innovacion.

E colaboracion lo enfoca riba diferente tema importante, incluyendo reserva natural, reforestacion, seguridad alimentario, reportahe internacional y apoyo cientifico pa decisionnan di politica publico y desaroyo hotelero. Gobierno tin intencion tambe pa facilita un presencia fisico di WUR na Aruba.

Como simbolo di e colaboracion, a planta un mata di dabaruida (“pan cu keshi”), representando crecimiento y futuro comparti. Gobierno ta mira e acuerdo como un oportunidad pa integra ciencia den politica publico, crea oportunidad pa estudiantenan y profesionalnan Arubiano y fortalece rol di Aruba den Caribe como centro di transferencia di conocemento riba sostenibilidad y biodiversidad.