• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Mi momento cu e pionero di noticia, e fundador di CNN Ted Turner

Skirbi pa Tito Laclé

Ora cu e noticia di fayecimento di e pionero di Cable News Network (CNN) Ted Turner a bira conoci diaranson mainta, mesora esaki a hiba mi bek na mi tempo cu mi a core stage na e canal ey na 1997. Y mirando cu e bishita aki na CNN a defini mi carera como periodista grandemente, mi a dicidi di comparti e momento aki aworaki, pasobra mi ta conciente tambe con importante y grandi e momento cu Turner ta. Den carera di un persona, tur e momentonan aki ta yuda defini bo persona den e funcion cu bo ta eherce. Y pa ta un persona di un isla asina chikito, pa por haci esaki, si, e ta un logro, cu mi kier promove. Y manera e dicho na ingles ta bisa, ‘if you’ve got it, flaunt it!’. Enfin, mi tabatin algun aña trahando como reportero y anchor (presentador di noticia) na Telearuba, y como acuerdo cu e canal tabatin cu CNN, un persona di e canal por a haya e oportunidad pa pasa stage di 10 siman na CNN. Politica gerencial e tempo ey, no tabata kier a financia e experiencia aki. CNN no a ria, y a opta e tempo ey, pa nan kibra nan regla y nan mes financia mi estudio, (US$ 20.000,=) . Mi ta bisa esaki, pasobra e ta mustra cu CNN a reconoce e trabou di un local, mientras cu e local encarga mes no a haci esey, aunke den e recorte aki, e no ta asina importante. Y asina mi a embarca pa Atlanta, pa 10 siman pa core stage mei mei di e grandinan. Siña e arte di presenta noticia, (TV anchor), prepara e programanan noticioso mainta (morning shows, cu ta nifica presenta na trabou 4:30am pa e show cuminsa 7am) , subi caya cu un ekipo di noticia, pa traha raportahenan semanal. Enfin. Un sin fin di experiencia internacional noticioso televisa. Un di e highlights di e pasantia ey, tabata e encuentro cu e gigante e tempo ey, e fundador mes mes di CNN, esta Ted Turner. Mi tabata sa di e encuentro ey, y a bay prepara. A bay cerca e gobierno di turno na Aruba (e tempo ey Glenbert Croes tabata minister di Telecomunicacion) y a haya un relatiegeschenk pa duna Turner, si e momento yega. E momento ey a yega, pero no manera cu nos a planea. Solamente 6 (di 15 e grupo) di nos por a top’e, sinta na mesa y combersa cu ne. Estilo ora cu Rey Willem-Alexander scohe un grupo di persona selecta pa papia. Ey nos a papia y papia. Mi a conte di Aruba, y e tempo ey, e tabata impression pa mi dominio di varios idioma, y a bisa cu “porta nos mester a manda Tito cubri e storianan rond mundo, ya cu e ta defende e idiomanan asina bon”. Dado momento Turner a lanta bay, y nos tur a keda babuca. Pasobra ata nos tur cla cu nos regalito pe na man, pero e momento no a presenta pa haci esaki. Ey mi a tuma un curashi, kibra protocol, y lanta cana bay cerca dje, pa ofrec’e mi regalo di Aruba. Y riba dje, como si fuera poco, pone su representante saca nos potret e momento ey. Turner a keda sorprendi, y a comenta te hasta, ‘You are a feisty one, mr Aruba. I like that!”, y djey e la disparce. Durante mi tempo na CNN, tabata obvio cuanto poder Turner tabatin. E tabata hopi activo cu e canal y ora cu e cana drenta studio, bo tabata sa delanta. E sensacion, e nervio di trahado, pasobra “Ted Turner is in the building”. Sigur un momento bunita, cu awe mi ta recorda, na momento di e morto di e legendario y pionero di noticia. Mi mester bisa tambe, cu ta danki na Ted Turner, cu mi por a presenta varios raportahe di Aruba riba CNN, debi cu tabata SU idea pa bin cu e programa CNN World Report, contra tur conseho di su hendenan. Tur siman, Aruba por a wordo mira rond mundo, via un di e raportahenan dimi (y otronan manera Christina de Kort cu tambe a manda raportahe pa CNN). Entre e raportahenan, mi por recorda cu mi a entrevista e legendario musico di Aruba, Robert Jean’Dor (den feliz memoria), durante e Aruba Jazz & Latin Festival, tempo cu e tabata ainda na Renaissance Hotel su arena. Pero, mi prome raportahe cu mi a yega di traha di Aruba pa CNN, tabata uno di Tiera del Sol. Y uno hopi remarkable, tabata di studiantenan di International School of Aruba. Recuerdonan cu ta keda cu bo pa semper. Danki Ted Turner, danki CNN. Un experiencia cu ningun hende por kita di bo. Y cu a defini mi carera periodistico y cu awe bo ta lesando Noticiacla tur dia pa 12 aña largo. Cada cos ta pasa pa un motibo! Y no, e potret no ta AI, pero si AI a drecha e calidad di e potret di 31 aña bieu.