Pasaheronan di barco cu hantavirus a wordo evacua: Ta trata di un hulandes, ingles y aleman

Pasaheronan di barco cu hantavirus a wordo evacua: Ta trata di un hulandes, ingles y aleman

Posted on 05/6/2026 10:08 am AST | Updated on 05/6/2026 11:23 am AST

AMSTERDAM - Tres persona cu tabata abordo di e crucero Hondius a wordo evacua, segun Organisacion Mundial di Salud (WHO). Dos di nan ta presenta sintomanan agudo di hantavirus, mientras cu e tercer pasahero tabatin contacto cercano cu un otro persona cu presumiblemente a morto pa motibo di e virus.

Ta trata di un Hulandes di 41 aña, un Ingles di 56 aña y un señora Aleman di 65 aña. Nan ta wordo transporta cu buelonan di evacuacion medico pa hospitalnan den Europa. Hospital LUMC na Hulanda a confirma cu nan ta prepara pa ricibi un paciente, aunque ainda no ta completamente sigura cu e persona lo yega ey.

E crucero Hondius ta varios dia cera dilanti di costa di Praia, capital di Kaapverdi, despues cu autoridadnan local no a permiti e barco drenta haf. Despues di evacua e tres pasahero, e barco lo sigui su trayecto cu e otro pasaheronan, mientras cu dos doctor extra lo subi abordo pa monitor e situacion.

Gobierno di Spaña a permiti cu e crucero por drenta na Tenerife, pero presidente di Islanan Canario, Fernando Clavijo, ta opone fuerte contra esaki. El a declara cu no tin suficiente informacion pa tranquilisa poblacion di e isla y cu decision di gobierno central no ta suficientemente motiva.

Segun minister di salud di Spaña, e pasaheronan cu a keda abordo no ta mostra sintomanan. Ora nan yega Tenerife, nan lo wordo repatria pa nan paisnan. Pasaheronan Spaño lo drenta cuarentena den un hospital militar, mientras cu esnan di otro nacionalidad no necesariamente mester haci esaki.

Anteriormente, un otro pasahero a wordo hospitalisa den Johannesburg, Surafrica, unda e ta den intensive care. Ademas, tres otro pasahero a perde nan bida, incluyendo un pareja di 69 aña for di Friesland. Autoridadnan Surafricano a confirma cu dos paciente hospitalisa tin e variante Andes di hantavirus, un tipo cu por transmiti di persona pa persona. WHO a indica cu nan tabata cuenta cu e posibilidad ey.

  • Powered by SETAR