Moody’s ta subi perspectiva di Aruba pa ‘Positivo’: Confiansa internacional ta crece

Moody’s ta subi perspectiva di Aruba pa ‘Positivo’: Confiansa internacional ta crece

Posted on 05/4/2026 2:37 pm AST | Updated on 05/4/2026 2:44 pm AST

ORANJESTAD – Geoffrey Wever a anuncia cu Moody’s Ratings a cambia perspectiva di Aruba for di ‘Stabiel’ pa ‘Positivo’, manteniendo su rating na nivel Baa3. E decision ta mustra cu confiansa internacional den economia di Aruba ta crece y cu pais ta bay den direccion correcto.

Segun e informe, Aruba ta sigui reduci su debe nacional y por yega cerca di 50% di BNP pa 2031, mas rapido cu tabata spera. Moody’s ta reconoce tambe cu gobierno a maneha recuperacion despues di COVID-19 cu disciplina, dando prioridad na pago di debe y fortalecemento di reserva.

E agencia ta mira un posibilidad real pa un futuro subida di rating, sempre y cuando cu Aruba mantene su disciplina fiscal y reformanan structural. Tambe, posible aprobacion di e ley HOFA lo contribui na mas supervision fiscal y costo di interes mas abou.

E economia di Aruba ta mustra crecemento fuerte, cu inversion den turismo y reserva internacional superior na 40% di BNP. Segun Wever, “e cambio di perspectiva ta confirma cu Aruba ta sigui avansa cu responsabilidad y vision.”

Gobierno ta considera e decision como un señal positivo pa sigui cu su plan economico, fortalece confiansa di inversionistanan y construi un economia mas resistente pa futuro.

  • Powered by SETAR