Momento historico pa DIMP: Usuarionan tin acceso na nan informacion fiscal directo

Momento historico pa DIMP: Usuarionan tin acceso na nan informacion fiscal directo

Posted on 05/4/2026 11:13 am AST | Updated on 05/4/2026 11:32 am AST

ORANJESTAD – Despues di luna di trabou intensivo tras di cortina, Departamento di Impuesto di Aruba a lansa oficialmente su servicionan nobo di e portal digital “Bo Impuesto”, un plataforma cu segun directora Luenne Gomes-Pieters, ta marca un momento historico tanto pa e institucion como pa comunidad di Aruba.

DIA HISTORICO

“E ta un dia historico. Tanto pa nos como departamento di impuesto, y pa comunidad di Aruba henter,” Gomes-Pieters a declara, enfatizando cu esaki ta un paso grandi den modernisacion di servicio publico. E portal nobo ta permiti contribuyente nan pa accesa nan informacion fiscal directo, for di nan mesun cas of oficina.

RESUMEN COMPLETO

Pa prome biaha, tanto persona individual como comerciante y compania nan lo por mira un resumen completo di nan cuenta online. Esaki ta inclui debe nan venci, debe nan cu ainda no a vence, y hasta suma nan cu contribuyente tin derecho di ricibi como restitucion. Tur esaki ta visibel den un dashboard digital personal.

AREGLO DI PAGO

Segun e directora, e sistema ta bay mas leu cu solamente informacion. Contribuyente nan lo por regla nan propio arreglo di pago directamente den e portal. “No mester manda email, no mester yama, no mester para den rij,” Gomes-Pieters a splica. E arreglo di pago por wordo estableci pa un periodo maximo di 24 luna, cu minimo di AFL100 pa persona individual y AFL 1.000 pa compania.

ACCESO RAPIDO

E introduccion di e servicio nobo di e portal tambe ta responde na un problema recurrente: falta di acceso rapido na informacion. Den pasado, hopi contribuyente tabata depende di contacto directo cu departamento, algo cu tabata crea retraso paso volumen grandi di trabou y un equipo limita. Cu e sistema nobo, e control ta bay direct riba man di e ciudadano.

HISTORIAL COMPLETO

Ademas, “Bo Impuesto” ta ofrece un historial completo di pago nan te cu cinco aña atras. Contribuyente lo por verifica pagonan hasi cash, via debit card, online of pa medio di Direccion di Financien. Tur informacion ta actualisa den tempo real, loke kiermen cu pago hasi awe mes, lo ta visibel casi inmediatamente den sistema.

CAMPAÑA INFORMATIVO

Departamento di Impuesto tambe a cuminsa un campaña informativo pa guia comunidad. Un flyer den cuatro idioma lo wordo distribui cas pa cas, cu instruccion paso pa paso pa registra y activa un cuenta personal.

COMERCIANTENAN

Comerciante nan cu ya tin acceso na e portal no mester registra nan negoshi di nobo. Nan por drenta directamente pa mira estado di cuenta, cera arreglo di pago y consulta historial di pago. Directornan di compania tin opcion pa usa nan cuenta existente of crea un cuenta separa como contribuyente individual.

CAMBIO DI MENTALIDAD 

Gomes-Pieters a describi e portal como un cambio di mentalidad: “Nos ta duna contribuyente e control, e ta den driver seat di su propio asunto di impuesto.” Departamento ta invita tur ciudadano pa bishita impuesto.aw pa registra y cuminsa usa e servicio digital nobo. Cu e lanzamiento di “Bo Impuesto”, Aruba ta drenta un era nobo di servicio publico digital, unda facilidad, transparencia y eficiencia ta keda central.

  • Powered by SETAR