Tormenta politico pa un buelo: Minister Croes ta insisti di no a haci nada illegal

ORANJESTAD –   Minister Gerlien Croes diahuebs anochi den e programa Noticiacla LIVE, a sali firme pa defende su decision di haci uso di un buelo den marco di su funcion aña pasa, calificando e critica (di oposicion ) como un intento claro di kibra su credibilidad politico. Tabata aña pasa cu e la haya critica ora cu e la opta pa bula cu un avion priva pa asuntonan di trabou, creando asina duda si e loke e la haci tabata corecto como minister. Oposicion (MEP:red) tin varios luna ta cuestiona e mandatario en cuestion. A raiz di esey,  periodista Tito Laclé a haci preguntanan directo na e mandatario riba esaki. Entre otro, ki dia e la paga (pa e buelo), ⁠⁠cuanto e la paga, ⁠⁠na ken e la paga.

REACCION AMPLIO 

Den un reaccion amplio, Croes a indica cu e tema di e buelo a bira un punto di atake constante, aun despues di varios debate den Parlamento. “Durante presupuesto 2026, hasta a yega na un mocion di desconfianza contra mi persona. Esaki ta e poder mas halto cu Parlamento por usa, y nan a usa esey contra mi pa e asunto di e buelo,” e minister a bisa. Segun Croes, e uso di e buelo no tabata nada fuera di lo normal, y mucho menos illegal. “No ta contra ley pa comparti gasto. Mi a paga cu mi propio placa, no cu placa di comunidad,” e la enfatisa, agregando cu e practica di comparti gasto ta algo comun, incluso entre abogado y otro profesionalnan.

LEY MERICANO NO TA APLICABEL NA ARUBA 

Un di e puntanan cu e minister a critica fuertemente ta e uso di opinion legal externo pa cuestiona su accion. Segun Croes, oposicion a basa nan critica riba conseho di un jurista americano. “Como si fuera cu ley americano ta aplicabel na Aruba. Esaki no ta e caso,” e la bisa, rechazando e argumento completamente. “Mi tambe por pidi conseho di un abogado americano, pero esey no ta cambia nada di nos realidad huridico aki.”

ATAKE PERSONAL Y POLITICO

Croes no a scapa di menciona cu e tono di e critica tin un meta politico. “Mi ta ripara cu nan ta purba kibra mi credibilidad como persona politico. Pero esey no ta molestia mi,” e la declara. Segun e minister, e narrativa cu tin algun tipo di beneficio personal of fabor politico ta incorrecto. “Nan kier crea impresion cu a tin algun tipo di bentaha of intercambio politico, pero esey no ta e caso,” e la bisa.

TRANSPARENCIA RIBA GASTO

Croes a enfatisa cu semper e la actua cu transparencia riba uso di fondo publico. “Locual cu ta placa di comunidad, mi ta frontal riba esey. Pero den e caso aki, mi a paga cu mi propio placa,” e la aclara. E minister a agrega cu, una biaha un tema asina wordo politisa, tur accion personal ta wordo cuestiona. “Awo, si mi ta den un restaurant cu mi familia, lo tin hende cu lo pregunta ken a paga. Pero esey ta e realidad ora bo habri e tipo di debate aki,” e a bisa.

NO A HACI NADA ILLEGAL 

Croes a mantene su posicion cu su accion tabata completamente dentro di marco legal. “No tin ningun caminda cu ta stipula cu un hende no por haci uso di e tipo di buelo aki,” e la bisa 

CRITICA RIBA OPOSICION

Finalmente, Croes a cuestiona e enfoke di oposicion actual. “Esaki tambe ta mustra ki tipo di oposicion nos tin aworaki,” e a bisa, señalando cu e tema a wordo exagera pa fin politico. Mientras cu e discusion ta sigui den esfera publico, Croes a laga cla cu lo semper tin opinion diferente riba cualkier tema. “Tur hende por tin su opinion huridico. Pero esey no ta cambia e hecho cu mi no a hasi nada contra ley,” e minister a conclui. Mientrastanto, e tema di uso di recurso, transparencia y integridad politico lo sigui ta den centro di debate na Aruba.