Awe mainta, polis y DTP a cuminsa piki e-step, y scooters riba caminda publico !

ORANJESTAD – Un siman despues cu minister  di Husticia, Arthur Dowers, a anuncia cu lo cuminsa kita e-steps, e-bikes y scooters riba caminda publico, awe mainta personal di DTP, y polis a cuminsa fisicamente cu e accion di kita tur e aparatonan aki. Mientras cu hopi a bay caba, toch tabatin basta cu mester a kita di tur forma.  Durante un entrevista na Strandpolitie, Dowers a splica cu polis, hunto cu   DTP   ta haci operacion coordiná pa kita e aparatonan for di caminda.  . “Nos a duna hopi oportunidad pa nan kita e stepnan, pero ainda tin un grupo cu no kier acepta con e ley ta na Aruba,” Dowers a bisa. “Uso di e tipo di aparatonan aki riba tereno publico ta ilegal, y awor nos lo tuma accion pa kita nan.” Segun e minister, esnan cu no ta cumpli lo wordo confisca, unda despues lo wordo determina si nan por ricibi nan propiedad bek, segun cu ley ta stipula.

Ademas, autoridad  a constata varios infraccion, incluyendo violacion di regla di trafico y regulacionnan ambiental. “Nos lo traha tambe cu multa pa confronta esnan cu ta violando e ley cu realidad,” Dowers a indica. Riba pregunta di Noticiacla, si gara un turista coriendo riba un di e aparatonan aki, si lo multa e turista, Dowers a bisa cu no, pero lo kita e aparato di dje, y multa e doño di e compania. Durante e operacion, algun grupo a intenta core y laga e area ora polis a yega. Ministro Dowers a bisa cla: “Corre for di autoridad ta contra ley. Polis tin autoridad pa para nan y hiba nan pa comisaria.”

CARTA LEGAL DI ABOGADO

Dowers tambe a confirma cu tin discusion legal cu algun operador, cu a manda carta via abogado pidiendo pa legalisa e actividad. Sin embargo, gobierno no ta dispuesto pa cambia e posicion. “Gobierno no lo legalisa e acto aki na Aruba,” el a enfatisa, añadiendo cu esnan cu no ta di acuerdo tin derecho pa bai corte.

MANTENE ORDO

Finalmente, e minister a bisa cu accion actual ta necesario pa mantene orden. “Si nos no actua awor, despues no tin forma di para esaki. E señal ta cla: Ley mester wordo respeta.”

Autoridadnan ta indica cu control y enforcement lo continua den e dianan benidero, cu polis manteniendo autoridad pa actua cada biaha cu nan constata infraccion.