Minister di Salud a presenta plan concreto pa adictonan ambulante

ORANJESTAD  – Gobierno pa medio di minister Mervin Wyatt (Maneho di Addiccion) ta traha riba un plan concreto pa atende problematica di adictonan ambulante cu ta biba riba caya y cu hopi biaha ta keda afo di sistema di cuido.

Como parti di esaki, a presenta un propuesta door di Bureau Ondersteuning Verslavingszorg (BOV), pa crea un facilidad enfoca riba cuido y intervencion pa personanan cu adiccion y problema mental severo. E plan tambe a wordo presenta den Conseho di Minister.

E enfoque principal ta pa fortalece cuido y intervencion den situacion critico, den un ambiente controla y sigur. Ademas, tin intencion pa habri un daklozenopvang cu lo funciona 24 ora pa dia, unda persona cu adiccion por haya refugio, asistencia basico y guia pa recuperacion.

E iniciativa ta apunta riba un problema real den comunidad: personanan cu ta keda afo di sistema tradicional di cuido. Cu e facilidadnan nobo, meta ta pa brinda acceso mas directo na ayudo y crea oportunidad pa rehabilitacion y reintegracion.

Autoridadnan indica cu e proximo paso ta implementacion di e plan den colaboracion cu diferente organisacion relevante, pa asina mehora e maneho di adiccion na Aruba.