Parlamentario Bermudez na AHATA : “Señalnan di trahadonan no por wordo ignora”

ORANJESTAD  — Parlamentario di fraccion AVP, Carlos Bermudez, dialuna a reacciona di forma critico y firme riba e declaracion di un representante di AHATA. AHATA recientemente a cuestiona e alegacion di e parlamentario, y a manda un carta pa e minister di turismo en cuestion, riba critica di con ta trata trahadonan den sector hotelero. Segun e parlamentario, su preguntanan y sugerencianan na minister responsabel pa labor y turismo no tabata sin base, pero fundamenta riba señalnan serio y repetitivo cu ta bini directamente for di trahadonan den sector turistico.

CASO AISLA

Bermudez a indica cu e situacion no ta trata di un caso aisla. Segun e parlamentario, decenas di empleado di hotel a acerca su persona pa comparti preocupacion tocante condicionnan di trabao, y den algun caso hasta alegacion di maltrato mental. Pa motibo di miedo pa represaya of hasta perde trabou, hopi di e trahadonan no ta atrebe pa presenta nan keho oficialmente na Departamento di Labor. Pa proteha nan identidad, e parlamentario a scoge pa no menciona ningun hotel especifico.

REPRESENTANTE DI PUEBLO

Como representante di pueblo, Bermudez ta considera cu ta su deber pa tuma e señalnan aki na serio. Pesei, e la manda un carta oficial na minister Cicilia, solicitando un investigacion y proponiendo medidanan concreto pa fortalece control y proteccion di trahadonan den sector hotelero.

ATACA HENTER INDUSTRIA HOTELERO

E reaccion di AHATA, segun Bermudez, a wordo percibi como defensivo y critico riba su accionnan, en vez di reconoci e preocupacionnan presenta. E parlamentario a enfatisa cu su intencion nunca tabata pa generalisa of ataca henter industria, y cu tin hotelnan cu si ta cumpli cu ley y trata nan empleado corectamente. Segun dje, un investigacion transparente lo por justamente fortalece reputacion di e hotelnan cu ta haci cos bon.

DEFENSIVO

Bermudez a plantea e pregunta dicon un reaccion asina defensivo ta surgi si tur cos ta na orden. “Si tur dunado di trabou ta cumpli cu ley, no tin motibo pa preocupa,” e la indica, añadiendo cu solamente esnan cu no ta cumpli por sinti presion.

DERECHO PA DEFENDE

Finalmente, e parlamentario a reconoci derecho di AHATA pa defende e sector, pero a subraya cu esaki no mester minimisa preocupacionnan legitimo di trahadonan. E la nota cu ta interesante cu mes AHATA a pidi un investigacion tambe, algo cu segun e confirma cu mas transparencia y control ta necesario, tanto pa proteha empleado como pa fortalece sector hotelero.