Homber a tira den hotel durante Correspondents’ Dinner: Trump a wordo evacua

WASHINGTON - E presidente di Merca Donald Trump a wordo evacua pa agentenan di servicio secreto durante e White House Correspondents' Dinner na White House, despues cu un zonido fuerte a wordo tendi. Diferente presente a indica cu nan a tende disparonan.

Un oficial di polis a confirma cu un persona a tira na e hotel unda Trump tabata cenando. E incidente a tuma lugar pafor di e salon unda e cena tabata ocuriendo.

Entre otro, e Secret Service a indica cu un sospechoso a wordo detene. Te awor, no tin informacion claro tocante su condicion.

Segun Federal Bureau of Investigation, un persona cu un arma di fuego a intenta pa kibra e barera pa pasa e seguridad di e cena di prensa. Segun diferente fuente, e sospechoso a intenta drenta e salon. Tambe e persona aki a tira riba un agente di servicio secreto. E agente a wordo alcanza riba su chaleco a prueba di bala, y segun un colega, e ta bon.

CENA POSPONE

E cena a wordo cancela y lo wordo reanuda den algun momento dentro di 30 dia. Presidente Trump tabata kier cu e evento sigui awe mes, pero servicio di seguridad a evita esaki.

“Polis a pidi nos pa laga e edificio, segun protocolo, y nos lo haci esaki inmediatamente,” presidente a scirbi riba Truth Social.

“RAPIDO Y VALIENTE”

E presidente americano a reacciona riba e incidente y a gradici e Secret Service y polis pa nan trabou. “Nan a actua rapido y cu balentia. E tirador a wordo captura,” el a bisa.

Presente nan a relata cu di repente hopi agente di servicio di seguridad a drenta e salon, creando panico. Hopi persona a sconde di mesa of a trata di core.

Segun CNN, Trump a wordo hibá na un lugar sigur. Mesun cos ta conta pa vicepresidente JD Vance y primera dama Melania Trump. Ningun persona no a resulta herida.

Tambe otro funcionaronan di gobierno Trump cu tabata presente na e cena a wordo evacua. Hopi di e aproximadamente 2600 presente a busca busca pa sconde durante e incidente.