Contrario na e-step y e-scooters, no lo pone ATV's y UTV’s riba lista di prohibicion!

ORANJESTAD – Despues di e decision fuerte pa saca e-steps y scooters for di camindanan publico, Ministro di Husticia Arthur Dowers a clarifica y contestando periodista Tito Laclé diahuebs anochi den e programa Noticiacla LIVE, cu un mensahe directo: ATV y UTV no ta siguiente riba lista pa prohibicion—pero tolerancia pa abuso ta caba.

NO TA CONTRA ATV Y UTV

Den su reaccion, Dowers a laga cla cu e enfoke di gobierno no ta contra un tipo di vehiculo specifico, sino contra comportamiento irresponsabel. “Si un hende ta contra di regla y ley, nos lo tuma accion y kita e vehiculo for di caya,” e la declara.

DIFERENCIA IMPORTANTE

E posicion aki ta marca un diferencia importante cu e-stepnan, cu a wordo saca casi completamente for di uso riba caminda publico. Segun e minister, e decision anterior tabata necesario debido na falta di control y riesgo inmediato pa seguridad vial.

ATV Y UTV TA LEGAL

ATV y UTV, segun Dowers, ta opera bou di un marco legal existente, y mientras usuario ta cumpli cu e regla nan, no tin razon pa un prohibicion general. “Mescos cu un auto: si bo ta cumpli cu ley, bo por sigui core nan. Si no, bo ta sali,” e la pone claro.

NATURALEZA BOU PRESION

Sinembargo, e minister a reconose cu tin un area caminda preocupacion ta aumenta: daño na naturaleza. Particularmente den area proteha, unda ATV y UTV a wordo mira drenta zona cu no ta permiti. “E problema principal ta cu ATV ta causa ta den naturaleza,” Dowers a bisa. “Ora nan drenta y destrui area natural, esaki no ta aceptabel.” E tema aki no ta nobo. Gobierno anterior a evalua opcion pa crea ruta specifico pa e tipo di vehiculo aki, pero te ainda no tin un decision final. Pa momento, e situacion ta keda den evaluacion.

MENSAHE DURO

E liña di gobierno ta cla: No tin prohibicion general pa ATV y UTV, pero tampoco no tin tolerancia pa abuso. Cualkier vehiculo—sea step, ATV of auto—cu no ta cumpli cu ley, lo enfrenta accion directo. Cu e posicion aki, Dowers ta manda un señal fuerte den medio di un debate creciente riba transporte, seguridad y proteccion di medio ambiente na Aruba.