AHATA ta aplaudi decision pa prohibi e-steps y scooters riba caminda publico

ORANJESTAD – Aruba Hotel and Tourism Association (AHATA) a reacciona positivamente cerca Noticiacla diahuebs, riba e decision di minister di Husticia Arthur Dowers pa prohibi uso di e-steps y scooters riba camindanan publico, un medida cu segun sector turistico tabata urgente debido na preocupacion creciente riba seguridad vial.

GRATITUD

Den un declaracion, CEO di AHATA, Tisa LaSorte, a expresa su gratitud pa e intervencion di gobierno, indicando cu e situacion tabata “chaotico y peligroso”. Segun LaSorte, aumento rapido di micro-transportacion sin regulacion cla a crea riesgo tanto pa peatonnan, conductornan como pa turista.

“AHATA ta agradecido cu Minister Dowers a pone atencion y hasi declaracion definitivo tocante e situacion di micro-transportacion na Aruba. E situacion ta chaotico y peligroso, y nos ta spera cu Polis por tuma accion pronto,” LaSorte a declara.

ESFUERSO MAS AMPLIO

E decision di prohibi e uso di e vehiculonan riba caminda publico ta forma parti di un esfuerzo mas amplio pa restablece orden den trafico y reduci incidentenan. Den ultimo lunanan, tabatin crece preocupacion den comunidad y sector turistico riba comportacion irresponsabel y falta di control riba e-steps y scooters, especialmente den zona cu hopi trafico.

AHATA a enfatisa cu seguridad di e bishitante y residente mester keda prioridad, y a expresa confianza cu autoridadnan lo implementa e medida di forma efectivo. E organisacion ta spera cu polis lo tuma accion rapido pa haci cumpli e regla nobo y pone fin na situacion actual. Cu e posicion firme aki, sector turistico ta manda un mensahe cla: innovacion den transporte mester bai man cu regulacion y seguridad pa proteha imagen y bienestar di Aruba como destino internacional.