Trump cla pa rescata Spirit Airlines cu $500 miyon; Aruba entre e destinacionnan

WASHINGTON/ ORANJESTAD – E aeroliña Spirit Airlines ta cerca di logra un pakete di rescate di mas o menos $500 miyon cu gobierno federal di Merca, cu ayudo di presidente mericano Trump, pa evita cu e aeroliña para su operacion completamente. E acuerdo lo inclui participacion di gobierno den e compania, cu a enfrenta dificultad financiero serio desde despues di pandemia y recente subida fuerte di prijs di combustibel pa avion.

E rescate lo permiti Spirit continua operando mientras e completa su reorganisacion despues di bancarota, evitando cu miles di empleado perde nan trabou y millones di pasahero keda afecta. Sinembargo, e posible apoyo financiero ta causa critica den industria di aviacion, pasobra otro aeroliñanan tambe ta enfrenta costo halto sin haya mes tipo di asistencia.

Spirit ta conoci pa su pasashi barato, cu a yuda baha prijs den mercado, pero su modelo di negocio ya tabata bou presion. Subida di costo di combustibel y situacion geopolitico reciente a empeora e situacion.

Pa Aruba, e noticia tin relevancia directo, pasobra e isla ta uno di e destinacionnan di Spirit Airlines, y cualkier cambio den operacion di e aeroliña por tin impacto riba conectividad y prijs di biahe pa y for di Aruba.