KIA den proceso pa reforsa personal pa enfrenta presion y futuro expansion

ORANJESTAD - Gobierno, bou di liderazgo di Minister di Husticia Arthur Dowers, a anuncia un paso importante pa reforsa Instituto Coreccional KIA, despues di largo tempo sin incorpora personal nobo. E decision ta bini den un momento strategico, mirando e presion riba e personal actual y e plan pa construi un facilidad coreccional nobo.

E iniciativa ta enfoca riba prepara un grupo nobo di personal coreccional pa periodo 2026-2027, cu enfasis no solamente riba seguridad, pero tambe riba guia detenidonan y contribui na nan resocialisacion. Esaki ta mustra un cambio di enfoke den e sistema di husticia, caminda dignidad humano y rehabilitacion ta bira mas central.

Gobierno ta busca candidato cu cualificacion especifico y dispuesto pa pasa un proceso riguroso di seleccion. Di tur solicitante, solamente un grupo selecto lo wordo escogi pa un trayecto intensivo, cu al final lo permiti nan drenta oficialmente den servicio publico.

Cu e paso aki, Gobierno ta manda un senal cla: fortalecemento di e sistema coreccional ta esencial pa garantisa un husticia mas efectivo, humano y prepara pa e demanda di futuro.