Parlamentario ta pidi inspeccion urgente den sector hotelero pa proteha trahadornan

ORANJESTAD – Parlamentario di AVP, Ing. Carlos Bermudez, a hiba su preocupacion tocante situacionnan den sector hotelero na un siguiente nivel, solicitando un inspeccion urgente y dirigi riba e industria. Den un carta oficial manda na minister di Turismo y Labor, Bermudez a pidi pa desaroya y implementa un plan concreto di control pa atende e problematica.

E iniciativa aki ta bin despues cu e parlamentario a comparti publicamente su inquietud, loke a resulta den un aumento significativo di trahadornan cu a tuma contacto pa relata nan experiencia. Segun Bermudez, e informacion cu ta sali na cla ta preocupante y ta indica un patron di posible abuso laboral.

Entre e situacionnan menciona tin acusacion di intimidacion y presion riba trahadornan, rapportnan falso, suspension sin base solido, y decisionnan di retiro basa riba informacion incorecto sin duna oportunidad di defensa. Tambe a wordo menciona posible incumplimento di leynan laboral.

Segun Bermudez, algun di e kehonan ta apunta na gerentenan stranhero, pero e parlamentario a enfatisa cu no por generalisa e situacion. “No tur manager stranhero ta causa di problema,” e a aclara.

E enfoke principal di Bermudez ta riba solucion y accion. E ta considera cu ta momento pa tuma paso firme pa atende e problema na su raiz, y pa sigura cu tur empleador ta cumpli cu leynan di Aruba.

“Respeta leynan laboral no ta opcion. Ningun hende ta para riba ley, y abuso contra trahadornan no por wordo tolera,” Bermudez a declara.

E parlamentario a conclui cu un yamada pa unidad, indicando cu solucion di e problematica ta requiere esfuerzo conjunto. “Hunto nos ta mas fuerte,” e la agrega.