Dowers: Per direct ta prohibi tur step di ta riba caminda publico!

ORANJESTAD – Gobierno di Aruba a anuncia un medida inmediato pa prohibi tur tipo di step, incluyendo e-step y  asta e-bike riba camindanan publico. Ministro di Husticia, Arthur Dowers, a confirma e decision diamars mainta durante un conferencia di prensa. Segun e mandatario, cualkier persona cu wordo haya usando un di e vehiculonan aki riba caminda publico, lo haya un multa di 500 florin. Ademas, autoridadnan lo confisca e step mes. Dowers a splica cu actualmente no tin ningun base legal cu ta permiti uso di e vehiculonan aki riba caminanan publico, y tampoco no tin un solucion rapido pa regula esaki.

CONTROL 

“Ta momento pa nos tene control firme,” ministro a bisa. “Tur step motorisa, sin excepcion, si nan ta riba tereno publico, ta ilegal. No tin ningun ley cu ta permiti nan riba nos carreteranan.” E ministro a mustra cu e decision ta bini principalmente pa motibo di seguridad. Segun e , uso di e-step a aumenta, specialmente den area turistico, unda algun usuario ta core riba caminda, corta dilanti trafico y pone peatonnan y chauffeurnan na riesgo. Autoridad policial ya a cuminsa cu controlnan y lo intensifica esaki den e dianan cu ta bini. Persona cu wordo para lo no solamente haya multa, pero tambe por perde nan step.

HUURMENTO TAMBE TA ILEGAL

Gobierno tambe a aclara cu huurmento di stepnan riba Aruba ta ilegal si no tin permiso oficial di Ministerio di Transporte. Segun e ministro, actualmente no tin ningun base legal cu ta permiti e actividad aki. “Stepnan no por wordo verhuur na Aruba. No tin ningun marco legal pa esaki,” Dowers a enfatisa. E situacion ta complica mas, paso hopi di e compañianan cu ta ofrece e servicio aki no ta registra oficialmente. Diferente di otro tipo di vehiculo, autoridadnan no tin informacion ken e doño di e stepnan ta cu ta wordo laga riba caminda publico.

GOBIERNO TA ADVERTI PROPIETARIONAN

Gobierno a duna un advertencia cla na tur propietario y compañianan cu tin stepnan riba isla. Nan tin e oportunidad pa kita nan vehiculo boluntariamente. Si no, autoridadnan lo procede cu confiscacion. Si un step wordo confisca, e propietario mester tuma contacto cu autoridadnan pa recupera esaki, ademas di paga e multa correspondiente. “Si bo laga bo step riba caminda publico, nos lo bay cu ne,” ministro a bisa cla. “Y despues bo lo mester paga pa haya esaki bek.” Gobierno ta haci un yamada na comunidad pa coopera y respeta e medida nobo, cu tin como meta principal mantene seguridad riba caminda y reduci situacionnan peligroso den trafico. NOTA: E borchi di trafico den e potret ta un dramatisacion y ta sirbi solamente pa acompaña e articulo adhiunto.