MEP kier reunion urgente: Duda grandi riba encargonan di educacion sin licitacion

ORANJESTAD – Fraccion di Movimiento Electoral di Pueblo (MEP) a pidi oficialmente pa convoca un reunion publico urgente di Parlamento, despues di revelacionnan riba otorgacion di encargonan den sector di educacion sin licitacion. Segun e carta dirigi na presidente di Staten, e caso ta trata encargonan cu ta suma mas di Afl. 180.000, otorga bou di un disposicion excepcional den ley di licitacion. Aunke e ley ta permiti excepcion den situacionnan specifico, MEP ta mustra preocupacion cu e uso repetitivo di e mecanismo aki por ta indica un patronchi structural y no simplemente caso incidental.

E partido ta pone enfasis riba riesgo pa transparencia, igualdad di oportunidad pa empresario y uso correcto di fondo publico. Segun nan, e situacion ta levanta pregunta serio riba con excepcionnan legal ta wordo aplica den practica.

Ademas, MEP ta señala un dimension politico importante: e actual minister responsable anteriormente a critica practicanan similar mientras cu e tabata parlamentario. Segun e fraccion, consistencia den gobernacion ta esencial pa mantene credibilidad den politica.

Pa e motibo aki, MEP ta insisti pa un reunion urgente unda e tema lo wordo discuti publicamente y unda minister lo mester duna aclaracion riba e decisionnan tuma.