Stephany Sevinger riba sentencia di su tata Benny : “E ta un dolor cu mi no ta desea pa niun hende”

ORANJESTAD – Den un declaracion carga cu emocion y determinacion, parlamentario Stephany Sevinger (AVP) a papia abiertamente riba e impacto personal y politico cu e reciente sentencia contra su tata tabatin riba e y su famia. Esaki a sosode recientemente durante un reunion publico di Parlamento, despues cu su tata a keda sentencia pa Hoge Raad. 

DEBATE RIBA SU TATA RIBA RED SOCIAL

Sevinger a indica cu, aunke e tema a wordo discuti extensivamente, cu hasta tres ora di explicacion a wordo duna den Parlamento, e debate publico ainda ta sigui, specialmente riba rednan social manera Facebook. “Mi ta bai bisa e cosnan cla ,” Sevinger a expresa. “Mi ta wak hopi comentario, hopi discusion, hasta ora cu camaranan ta paga, y constantemente e tema di e sentencia di mi tata ta wordo menciona.”

HOPI DURO PA FAMIA

Segun e parlamentario, e situacion no ta solamente un asunto politico, sino tambe un asunto profundamente personal. “Esaki tabata hopi duro pa nos famia. Prome cu mi ta un politico, mi ta un yiu. Hopi hende mester comprende esey, paso nos tur ta yiu. Ta un experiencia hopi doloroso cu mi no ta desea pa ni un hende,” e la bisa.

ROL DEN PARLAMENTO

A pesar di e carga emocional, Sevinger a reafirma su compromiso cu su rol den Parlamento. El a subraya cu su decision pa bira miembro di Parlamento no tabata facil, pero cu e ta determinado pa cumpli cu su deber. “Mi a tuma e paso aki pa representa pueblo. No pa ataka ni bacha ningun hende, ni pa lastra famia di otro,” el a declara.

E parlamentario tambe a responde riba critica cu el no ta respeta privacidad di otro. Den su reaccion, Sevinger a defende su actuacion, indicando cu tur informacion cu el a comparti tabata basa riba evidencia concreto.

“Cada bes cu mi a menciona algo, mi a haci esey cu prueba den mi man. Si mi a papia di algo, tabata riba recibonan di un bufete di abogado. Si esey a toca bo tata, esey ta bo asunto, no di mi,” el a bisa.

El a enfatisa cu su intencion nunca tabata pa ataka persona personalmente. “Mi no ta carga odio den mi curason. Mi no ta aki pa kibra hende. Mi ta aki pa cumpli cu un labor, pa duna pueblo informacion y pa representa e confianza cu a wordo poni den mi,” Sevinger a conclui.

E declaracion di Sevinger ta mustra e delicado balans entre responsabilidad politico y realidad personal, mientras e tema continua genera reaccion fuerte den sociedad Arubiano.