Le Lanchon riba prome aña di Iberostar: “Aruba a ricibi nos cu braza habri y futuro ta prometedor”

Le Lanchon riba prome aña di Iberostar: “Aruba a ricibi nos cu braza habri y futuro ta prometedor”

Posted on 04/16/2026 4:06 pm AST | Updated on 04/16/2026 4:09 pm AST

ORANJESTAD – Na occasion di e celebracion ‘inoficial’  di su prome aniversario na Aruba diahuebs, mei mei di un grupo di periodista local selecta, gerente di JOIA by Iberostar, Arnoud Le Lanchon, a comparti su experiencia durante un entrevista cu periodista Tito Laclé di Noticiacla. Segun Le Lanchon, e prome aña di operacion a bin cu su propio reto, manera cualkier apertura di un hotel nobo den un destino nobo. Sinembargo, e la enfatisa cu e experiencia a supera expectativanan. “Manera tur apertura, tin su challenge, pero Aruba a sorprende nos positivamente. E recibimento caluroso di e comunidad y e partnershipnan cu nos a logra crea, a yuda hopi den nos integracion riba e isla,” e la declara.

TURISTA CU MENTE SOSTENIBEL

Un di e aspecto cu mas a impresiona e gerente ta e tipo di turista cu e hotel a logra atrae. “Nos ta mira cu e turista cu nos ta trece ta uno sostenible, cu tin cercania cu comunidad local y NGO’s. Den solamente un aña, nos a logra realiza varios proyecto, y esaki ta habri porta pa un futuro bunita di colaboracion,” e la bisa.

SHOCO SANCTUARY

Entre e iniciativanan, un proyecto cu sobresali pa Le Lanchon personal y profesionalmente ta e Shoco Sanctuary. “E ta algo special, paso nos a bin habri un hotel, pero nos a termina habri un ‘hotel’ pa Shoco prome cu nos propio hotel,” e la comenta cu un sonrisa. E proyecto, en colaboracion cu Greg Peterson y Aruba Birdlife Conservation, a logra duplica poblacion di Shoco na area di Tierra del Sol, representando actualmente 20% di e poblacion mundial di e especie.

ECONOMIA

Pa loke ta e lado economico, Le Lanchon a indica cu e prome aña a mustra resultadonan positivo. “Nos tabatin un ocupacion estable y bon. Awor nos ta mira cu e fruto di e  esfuerzo ta mustra, cu cifra hopi positivo y ocupacion fuerte,” el a splica. E la agrega cu e tipo di cliente cu e hotel ta atrae ta aporta directamente na economia di Aruba. “Nos clientenan tin curiosidad cultural, nan kier sali for di hotel, conoce Aruba berdaderamente y gasta riba e isla. Y ken  conoce Aruba berdaderamente, semper ta sali encanta,” e la conclui. Cu un prome aña considera exitoso, JOIA by Iberostar ta mira cu optimismo pa futuro, consolidando su presencia den Aruba cu enfoke riba sostenibilidad, comunidad y calidad den turismo.

  • Powered by SETAR