Analisis: Sentencia final di Avestruz: The Day After..

Scirbi pa Tito Laclé

Un dia despues cu Hoge Raad a confirma e condena den e caso Avestruz, esaki ta sigur: Aruba ta sinti e impacto no solamente den e sistema huridico, pero tambe den arena politico y den opinion publico. En corto, un dia despues, tur hende ta papiando di e tema y cada un den nan forma, depende unda bo ta y cu ken bo papia. Echo ta cu e decision final a pone punto na un proceso largo. Pero, awor e la habri un debate nobo: Con e castigo lo wordo ehecuta y kico realmente ta cambia pa pueblo. Y Noticiacla a sigui e caminda y tin gran parti di e contestanan pabo. 

POLITICA

Di e banda politico, reaccionnan ta mustra un contraste cla. Partido mas grandi di oposicion, MEP (manera por a spera), a presenta e sentencia como un triunfo di estado di derecho, subrayando cu ningun lider politico no ta riba ley. Pa nan, e momento aki ta confirma cu husticia por prevalece, aunke e proceso a dura añanan largo. Di otro banda, di partido na mando AVP cu ta e partido unda cu e ex minister en cuestion ta(bata) forma parti, e reaccion oficial fuerte a keda limita na un declaracion di algun frase, for di e fraccion di e partido, pidiendo primordialmente pa respeta e famia awor (di Sevinger) y cu ta sigui sostene yiu di e condenado, cu ta forma parti di e fraccion. E contraste aki ta crea un ambiente di tension, pasobra e condenado ta(bata) un figura importante den e partido. Sigur mirando cu mientras e mes no ta forma parti activo di e partido, su yiu muher ta sigui. Den pasado, defensa di e acusado principal a habri e argumento di persecucion politico, pero cu e sentencia awor definitivo, e presion publico ta crece pa un posicion mas claro. 

REACCION DEN COMUNIDAD

Den comunidad, y specialmente riba rednan social, reaccion ta intenso y mezcla. Tin un parti di pueblo cu ta mira e decision como un victoria pa husticia, aunke ta expresa frustracion cu e proseso a dura demasiado tempo. Y otronan cu ta relaciona cu esnan condena, kier pa e ‘otro’ banda (specificamente esnan di partido MEP cu tin casonan pendiente contra nan), tambe haya forza di ley mes ‘duro’ cu esunan actual a haya. “Awe ta nos, pero mayan lo ta boso turno”, ta e pensamento den seno di simpatisantenan di esnan cu awor a ‘cay’. Tambe ta bira evidente cu desconfianza den sistema politico no a disparce; hopi comentario ta refleha e pensamiento cu, apesar di e condena, e sistema no semper trata tur hende igual.

EHECUCION DI CASTIGO

Mas cayente ainda ta e discusion riba ehecucion di e castigo. Rumornan circula tabata hopi. Entre nan, cu Korrektie Instituut Aruba (KIA) lo no (taba) tin suficiente espacio awor pa cera e condenadonan, loke a habri debate mesora riba posibilidad di usa enkelband como alternativa. E idea aki  a provoca reaccion fuerte, pasobra for di e reaccionan obteni, un parti grandi di pueblo ta spera cu un condena di prizon wordo cumpli literalmente, sin compromiso, pa ken cu ta, cua partido politico cu por ta. Y sigur pa e ex figura politico aki. For di Ministerio Publico sinembargo, varios  rumor a keda desbarata mesora. Entre nan, cu e uso di enkelband lo ta un alternativa. Y manera cu Noticiacla a publica caba awe, e proceso a cuminsa cana pa ehecuta e sentencia awor. 

E situacion aki ta elimina e pregunta central dilanti di Aruba: si husticia a wordo haci den corte, lo e mesun forma lo aplica e husticia den ehecucion? Un dia despues di e sentencia, e isla ta keda dividi entre satisfaccion y sceptisismo. E caso Avestruz no a caba cu e decision di corte. No. Al contrario, e la drentra un fase mas delicado, unda confianza di pueblo den sistema lo wordo determina door di e proximo pasonan cu wordo tuma. Y for di Ministerio Publico, por compronde cu tin tur intencion di cumpli cu e proceso, cu si tur cos cana manera mester, fin di luna esaki ta cumpli tambe.