AVP riba sentencia di Sevinger: Husticia mester sigui, pero cu respet pa famia

ORANJESTAD - Fraccion di AVP a reacciona awe oficialmente  riba e sentencia pronuncia den e caso Avestruz di Hoge Raad, cu ta involucra ex minister Benny Sevinger y colega di partido, subrayando cu ‘Aruba ta un Estado di Derecho unda e sistema hudicial opera di forma independiente y mester haya espacio pa cumpli cu su trabou sin interferencia’.

DECISION DI CORTE

Den un declaracion oficial, AVP a indica cu nan a tuma nota di e decision di corte, y cu nan ta respeta e proceso huridico den su totalidad. “ Fraccion a enfatisa cu independencia di e poder hudicial ta un pilar esencial pa mantene confianza publico den e sistema di husticia”.

EMPATIA PA COLEGA

Na mes tempo, AVP a mustra empatia pa nan colega den Parlamento, Stephany Sevinger, y su famia, yiu muher di Benny Sevinger. “Nos ta expresa nos sincero apoyo durante e periodo dificil aki,” e declaracion ta bisa, añadiendo cu respeto pa privacidad y dignidad di e famia ta fundamental mientras nan ta procesa e situacion.

COMPROMISO DI AVP

Fraccion AVP a reafirma tambe su compromiso cu transparencia, integridad y bon gobernacion. Segun nan, e lucha contra corupcion no ta para cu un solo caso. Nan a haci un yamada pa autoridadnan hudicial pa continua y acelera e investigacion di otro casonan di presunto corupcion cu ainda ta pendiente.

Cu esaki, AVP ta pone enfasis riba e importancia di un sistema di husticia cu no solamente ta independiente, pero tambe eficaz, pa asina fortalece confianza di pueblo den e Estado di Derecho.