Wever-Croes: Sentencia contra Sevinger ta un señal cla cu berdad a triunfa riba abuso di poder

ORANJESTAD – Despues di e veredicto definitivo di Hoge Raad den e caso Avestruz contra ex minister Benny Sevinger, lider di partido Evelyn Wever-Croes a reacciona cu palabranan fuerte pa Noticiacla, describiendo e momento como “un antes y un despues den historia di nos pais”.

Segun Wever-Croes, e decision di e corte supremo no ta solamente un paso huridico, sino un señal cla cu berdad a triunfa riba abuso di poder. “E veredicto final no ta simplemente un decision huridico; e ta e triunfo di e berdad riba e mal uzo di poder”, e la expresa.

E lider di MEP a subraya cu recursonan di pais ta “sagrado” y ta pertenece na pueblo, y cu e castigo den e caso ta mustra e gravedad di e falta di respet pa confianza publico. E ta bisa cu e situacion ta provoca un “tristesa profundo” mirando con e responsabilidad publico por wordo traiciona.\ Mas importante ainda, Wever-Croes a indica cu e fayo ta manda un mensahe sin ambiguedad: “e era di intocabilidad a caba”. Segun e, e sistema hudicial di Aruba a comproba cu e ta independiente y firme, apesar di presionnan externo.

Sin drenta den confrontacion politico directo, e lider politico a enfatisa cu e veredicto mes ta papia pa su mes, y cu politica mester ta basa riba servicio publico, no ganashi personal. E la haci un yamada pa reflexion, tanto pa lidernan politico como pa comunidad en general, resaltando cu integridad ta un responsabilidad comparti. “Corupcion ta stop ora nos tur, como cuidadano y como gobernante, dicidi cu bienestar general ta bin prome,” Wever-Croes a afirma.

Finalmente, e la reafirma su compromiso cu gobernacion transparente y integra, y a invita comunidad pa sigui mira padilanti cu confianza den husticia. “Laga nos sigui cu determinacion pa nunca mas permiti cu interes individual pasa riba bienestar di nos pueblo,” e la conclui.