Fundacion Muchila Creativo ta celebra 23 aña di crecemento creativo na Aruba

Fundacion Muchila Creativo ta celebra 23 aña di crecemento creativo na Aruba

Posted on 04/10/2026 9:33 am AST | Updated on 04/10/2026 9:33 am AST

ORANJESTAD - Awe ta un dia special pa Fundacion Muchila Creativo: 23 aña di dedicacion na arte, cultura y educacion inclusivo den comunidad Arubano. For di e aña 2003, e fundacion a carga un mision cla: stimula creatividad door di musica, arte visual, baile, teatro, literatura y multimedia — pa tur edad.

FUNDACION MUCHILA CREATIVO TA TRAHA A BASE DI TRES PILAR

Durante e añanan, Muchila Creativo a desaroya su mes den un organisacion cu ta traha a base di tres pilar fuerte: educativo, social-cultural y terapia.

1. Pilar Educativo

Bou di e pilar aki, e fundacion ta organisa proyectonan educativo cu ta conecta arte cu enseñansa.

Desde 2020, Muchila Creativo a tuma un paso importante na unda e la funda colegio Muchila Creativo cu un programa VSO (Voortgezet Speciaal Onderwijs) pa hoben neurodiverso di 12 te 28 aña.

Den e programa aki, arte ta core manera un liña cora den henter e curiculo, duna hoben nan e oportunidad pa descubri, desaroya y mustra nan talento den un ambiente sigur y creativo.

2. Pilar Social-Cultural

Muchila Creativo ta keda un motor activo den bida cultural di Aruba. E fundacion ta organisa curso, tayer y proyectonan pa comunidad cu ta uni hendenan di tur edad.

Actualmente, e organisacion ta traha riba e proyecto inspira di Let’s Act, caminda ta wordo desaroya un documental What Remains of Us — un proyecto artistico y social cu ta pone bos di hobennan den centro y ta mustra forsa di creacion colectivo.

3. Pilar Terapia

Bou di e pilar aki, Muchila Creativo ta uza arte manera un medio pa bienestar, proceso emocional y crecemento personal. E fundacion ta desaroya trayecto di terapia di arte cu ta yuda participantenan fortalece nan energia y expresion propio.

UN FUTURO YEN DI CREATIVIDAD Y COMUNIDAD

Fundacion Muchila Creativo ta mira bek cu orguyo riba 23 aña di crecemento, innovacion y colaboracion. Mesora, ta mira dilanti cu speransa y determinacion pa continua desaroya proyectonan cu ta enrikece, conecta y inspira comunidad Arubano pa hopi aña mas.

Fundacion Muchila Creativo ta localisa na Caya Betico Croes 83 den Oranjestad, den Violet Center for the Arts — un luga na unda creatividad ta bira bibo tur dia.

  • Powered by SETAR