Secretario di estado Van der Burg ta bishita Aruba di dos siman di april

DEN HAAG - Eric van der Burg, secretario di estado di Asuntonan Interno y Relacionnan den Reino, di 7 te cu 17 di april, ta bishita e seis islanan Caribense di Reino, di cual Aruba lo haya bishita dia 12 di april proximo.  Temanan cu lo ser trata durante e bishita di introduccion di e secretario di estado ta entre otro, gobernacion eficas, siguridad, resistencia economico, colaboracion den Reino y siguridad di cuminda. E mandatario tabata na Aruba recientemente durante e bishita di Rey Willem-Alexander caba. 

Durante su bishita na Aruba e secretario di estado ta haya un tour na entre otro Sunny Greenz, un empresario agricultor hoben. Ademas e  ta participa na e ‘LGO-EU Forum’. Esaki ta un plataforma internacional pa dialogo entre Union Europeo y e Pais- y Teritorionan Ultramar (LGO). E evento aki ta trece esnan responsabel pa maneho, diplomatico- y academiconan di e area Caribense, Ocean Pacifico, Ocean Indio y region Antartico hunto. E conferencia ta enfoca riba colaboracion strategico riba tereno di crecemento economico duradero, estado di derecho, adaptacion climatologico y transformacion digital.