Reformanan ta traha, pero progreso ta keda atras: Decision politico ta frena avance

ORANJESTAD – Un evaluacion intermedio di e ‘Onderlinge Regeling Samenwerking bij Hervormingen’ ta mustra cu, aunke e colaboracion entre Hulanda, Aruba, Corsou y Sint Maarten a pone reformanan na movimiento, e progreso ta keda lento y dependiente di decisionnan politico y capacidad di implementacion.E informe, publica na maart 2026, ta analiza con e sistema di colaboracion – crea despues di crisis di COVID-19 – a contribui na fortalecemento di economia y gobernacion di e paisnan den Reino. 

REFORMA GRANDI, CAPACIDAD CHIKITO

Segun e comision di evaluacion, e agenda di reforma tabata “hopi amplio y ambicioso” for di inicio. E paisnan mester a traha riba diferente sector na mes momento, mientras cu nan tabata ainda lida cu efecto economico y social di pandemia. E combinacion aki a pone presion grandi riba e capacidad di gobierno, loke a frena e velocidad di implementacion.

COLABORACION A LOGRA PONE PROCESO NA CAMINDA

Apesar di esaki, e informe ta reconoci cu e colaboracion den Reino sí a duna resultado concreto. Door di coordinacion, uso di expertisio y apoyo via e Tijdelijke Werkorganisatie (TWO), varios trayecto di reforma a logra cuminsa y wordo structura miho. E enfoke principal tabata riba fortalece e base economico y institucional di e paisnan.

PROGRESO NO TA GARANTISA

Sinembargo, e evaluacion ta laga cla cu progreso ainda no ta sigur. E ta depende fuertemente di prioridad cu gobierno ta duna na reformanan, disponibilidad di personal y recurso, stabilidad den posicionnan clave. Ademas, Aruba, Corsou y Sint Maarten no ta na mesun punto di salida, loke ta haci cu progreso ta varia entre nan.

HOPI REFORMA AINDA TA MITAR CAMINDA

Un punto critico den e informe ta cu hopi di e reformanan ainda no a yega fase final. Mucho hopi di nan ta den transicion di planificacion pa implementacion, y pa nan naturaleza, lo tuma mas tempo pa mustra resultado real. 

E MENSAHE CLA: SIGUI CU E COLABORACION

Riba base di e hallazgonan, e comision ta recomenda pa continua cu e colaboracion dentro di Reino. Meta ta pa evita cu reformanan cu a cuminsa, keda incompleto. Tambe ta pidi pa un discusion politico mas amplio tocante con colaboracion mester wordo estructura den futuro, mirando cu reformanan structural ta exigi un vision di largo plazo.

AUTONOMIA Y COLABORACION NO TA OPUESTO

E informe ta subraya cu, aunke cada pais tin responsabilidad pa su propio desaroyo, colaboracion dentro di Reino por ta un herramienta importante pa fortalece capacidad y sosten crecimiento. “Autonomia no mester wordo usa como motibo pa evita colaboracion,” e comision ta conclui.