Wever-Croes: Crimen scondi na Aruba: Trafico y contrabando di hende ta un realidad serio

ORANJESTAD – Den un reaccion presenta pa parlamentario Evelyn Wever-Croes como lider di fraccion di partido MEP, un presentacion reciente di Coordinatiecentrum Mensenhandel y Mensensmokkel Aruba (CMMA) den Parlamento, a pone cla cu Aruba ta enfrenta un problema serio cu trafico y contrabando di hende. Contrabando di hende ta trata di yuda persona drenta of keda ilegalmente na pais, mientras trafico di hende ta un delito mas grave, unda hende ta wordo explota, forza pa traha, of incluso obliga den prostitucion. E ultimo aki ta directamente contra dignidad humano.

Segun e presentacion, esaki no ta algo leu di nos – e situacionnan aki ta ocuri na Aruba tambe. P’esey, tin un enfoke grandi riba importancia pa comunidad reconoce señalnan y reporta caso sospechoso. CMMA ta hunga un rol clave den combate e tipo di criminalidad aki, cu un ekipo dedica cu ta traha pa proteha esnan mas vulnerabel den sociedad.

E mensaje principal ta cla: consciencia, vigilancia y accion di comunidad ta esencial pa preveni y combati e problema aki.