Hulanda: ABC-islanan no tin ningun rol den conflicto entre Merca y Venezuela

DEN HAAG – Hulanda a confirma cu no tin ningun documento ni evidencia cu Aruba, Curaçao y Bonaire ta hunga algun rol den e conflicto entre Merca  y Venezuela. E conclusion aki a sali for di un investigacion oficial bou di ley di apertura di informacion (Woo), unda gobierno a indica cu, despues di un buskeda amplio, no a haya ningun documento relevante. Gobierno ta enfatisa cu e islanan ABC no ta involucra den operacionnan militar di Merca contra Venezuela. Informacion cu si ta existi ta limita na cooperacion riba lucha contra droga y no tin relacion directo cu e conflicto. Aunke tabatin hopi especulacion pa largo tempo riba e importancia strategico di e islanan, especialmente pa presencia di facilidadnan americano den region, e investigacion no a revela ningun rol concreto pa e parti caribeño di Reino.