Vd Burg: Manifestacion contra HOFA no ta cambia curso di e ley

ORANJESTAD – Fuera di bisa e simpatisantenan contra ley di HOFA, cu e ta hiba nan critica pa Hulanda, secretario di estado Eric vd Burg no por a haci mas promesa. Asina e la sigura Tito Laclé di Noticiacla diabierna den un conferencia di prensa cu e mandatario hulandes. “Mi a bisa nan tambe cu ta trata di un ley di consenso, cu ta nifica cu tanto gobierno di Aruba como di Hulanda mester ta di acuerdo cu e ley pa e por wordo ehecuta, y cu esaki tabata e caso tambe” vd Burg a bisa. Cu esaki, e ta confirma cu gobierno di Aruba a bay di acuerdo cu e concepto actual, cu ta na Raad van State ainda na Hulanda. 

ARUBA TA PARA TRAS DI E LEY

Segun vd Burg, tanto e minister plenipotenciario nobo como prome minister a sigura cu nan ta para tras di e concepto aki. E la sigura cu e la bisa e manifestantenan tambe cu tin cu bin un landsverordening, esta un ley local riba e tema y cu e ta wardando e consehonan di tanto RvS prome cu por sigui cu e proceso. “Pues e momento aki, mi no por bay ni un banda ni otro banda, y no por adapta mi opinion, pasobra ta prome na RvS pa duna un conseho. “Y te e momento ey no ta na ami pa duna un otro opinion” e mandatario a sigui bisa, si mi tine mes”.  Esaki no kier men cu por deduci di e contesta ey cu e manifestacion no tabatin un efecto riba dje. “Loke mi a bisa, ta cu HOFA ta na RvS, y mi ta abstene mi mes di cualkier otro reaccion di loke mi a manda RvS. Ora cu mi haya e  documentonan bek, mi lo pidi e opinion un biaha mas na gobierno di Aruba, y mi sa con e manifestantenan ta sinti, y con RvS ta opina, y base di esey, mi lo dicidi kico mi ta bay haci” vd Burg a sigui bisa.