Grupo di venezolano ta protesta na Consulado: Ta exigi liberacion inmediato di Nicolas Maduro y Cilia Flores

ORANJESTAD – Un grupo di solidaridad cu Venezuela a reuni cerca consulado diahuebs mainta, pa mustra nan apoyo y exigi liberacion inmediato di Nicolás Maduro y su casa, Cilia Flores. Cu pancarta y mensahe fuerte, nan a grita pa cu nan wordo libera “YA”.

E accion ta tuma luga mesun dia cu Maduro y Flores ta presenta nan mes den un di dos audiencia den corte federal na Nueva York, despues di nan captura na januari.

E grupo ta considera cu detencion di e lider Venezolano y su esposa ta inhusto, y nan ta pidi respet  pa derecho y soberania di Venezuela. Durante e manifestacion, a haci tambe un yamada pa unidad y paz, enfatizando cu conflicto no ta e solucion.

E caso legal contra Maduro ta continua na Merca, unda e  ta enfrenta acusacion serio, incluyendo narcotrafico, mientras e  y su defensa ta mantene su inocencia.

Manifestantenan a expresa cu nan lo sigui alza nan bos te ora cu nan mira un solucion, manteniendo presion internacional riba e caso.