Segun Oostindie, falta di respet ta mantene tension den Reino

ORANJESTAD – Experto den relacionnan di Reino Hulandes, profesor. Gert Oostindie durante e programa Noticiacla LIVE diahuebs anochi, entre temanan toca, a pone enfasis riba e tension structural cu ainda ta existi entre Hulanda y paisnan Caribeño manera Aruba, señalando cu falta di balansa entre autonomia y control ta sigui causa friccion.

DIFERENCIA FUNDAMENTAL

Segun Oostindie, e diferencia fundamental ta den forma cu cada partido (pais:red)  ta mira e responsabilidad y independencia. Mientras Hulanda ta enfoca riba garantia financiero y gobernabilidad, paisnan Caribeño (manera Aruba),  ta enfatisa nan derecho di autonomia como pais dentro di Reino. E contraste aki ta sali claramente na luz den discusionnan actual rond di ley nan manera HOFA.

TENSION ATROBE 

“Atrobe nos ta mira e mesun tension,” Oostindie a splica. “Hulanda ta pensa den riesgo y control, mientras e isla nan ta percibi esaki como interferencia.” Segun e experto, e problema principal no ta necesariamente e intencion di Hulanda, sino e manera con e control ta wordo implementa. El a indica cu un acercamento “top-down” no ta cay bon den Caribe y ta contribui na percepcion di falta di respet. Mes momento, Oostindie a reconoce cu e situacion no ta simpel ni unidimensional. “E no ta blanco of preto,” e la bisa, señalando cu tambe tin caso unda gobernancion riba e islanan no tabata optimo, loke ta duna Hulanda cierto base pa su preocupacionnan. Sin embargo, e solucion segun e, ta den mas dialogo y cooperacion riba base di igualdad. “Autonomia no ta nifica falta di cooperacion,” Oostindie a enfatisa. “Pero cooperacion mester ta igualitario y basa riba respeto mutuo.” Sin e balansa, e la adverti, tension den di Reino lo continua ripiti, manera cu ta visible den e debate actual. Pa wak e programa completo, click AKI 

KEN TA GERT OOSTINDIE

Gert Oostindie ta profesor emerito di Historia Colonial y Postcolonial na Universiteit di Leiden y ex-director di KITLV (Instituto Real Hulandes pa Estudionan di Asia di Sudeste y Caribe). E la (co-)dirigi programa di investigacion financia pa gobierno tocante “Independencia, Decolonisacion, Violencia y Guerra den Indonesia, 1945-1950”, manera tambe programanan financia pa NWO manera “Traveling Caribbean Heritage”, “Confronting Caribbean Challenges”, “Dutch Atlantic Connections” y “Bringing History Home in the Postcolonial Netherlands”. Ademas, el a lidera proyectonan di investigacion riba pasado colonial y di sclavitud di ciudadnan manera Rotterdam y Den Haag, encarga pa consehonan municipal. El ta un contribuidor frecuente den medionan di comunicacion riba su area di experencia.

INVESTIGACION

E area principal di investigacion di Oostindie ta studionan comparativo di Caribe y historia colonial y postcolonial Hulandes. E la publica y edita mas cu 30 buki, principalmente den ingles of hulandes, y a scirbi hopi articulo tocante historia colonial y decolonisacion di Caribe Hulandes; historia, etnicidad y migracion den Caribe y Latinoamerica; sclavitud Atlantico y su consecuencia; migracion postcolonial y importancia di historia colonial pa identidad nacional Hulandes; y politica Hulandes y violencia extremo durante guerra di independencia di Indonesia.