Protesta na Aruba contra HOFA a hala atencion na Hulanda

ORANJESTAD – Aunke cu autoridad na Aruba a ubica e grupo di sindicato cu a protesta diaranson na Aruba riba e ley di HOFA, na momento cu Rey Willem-Alexander tabata di bishita, den un skina na banda, esaki a hala atencion si. Y no solamente di e mandatarionan, sino tambe di prensa hulandes. E la haci suficiente efecto cu na Hulanda, esaki tambe a keda refleha den medionan hulandes diahuebns. 

E PROTESTA

Solo, fiesta, pero tambe protesta a ricibi Rey Willem-Alexander diaranson mainta ora e a cuminza su bishita na Aruba. Segun e raportahe di prensa hulandes, mas o menos ochenta manifestante tabata presente na inicio di e dia nacional, hunto cu hende cu a sali pa celebra y turista mericano curioso.

PREOCUPACION

E raportahe di medio hulandes ta mustra cu e dia festivo tabatin tambe un banda mas serio: tin preocupacion den e pais tocante inmigracion, tensionnan geopolitico rond di Venezuela, e gran afluencia di turismo y e situacion financiero.

HOFA

Por ehempel, tin e yamada HOFA, un ley di consenso cu segun gabinete mester yuda logra haci e finansas di gobierno mas saludable na Aruba. Pesei, manifestantenan a spera e Rey, bisti cu camiseta cu mensahe manera ‘Nos por haci esaki nos mes’. Nan ta considera supervison financiero como un atake riba autonomia di Aruba.

VAN DER BURG

E Rey no a papia cu e manifestantenan riba ruta, diferente di staatssecretaris Eric van der Burg cu si a haci esaki. Pero den su discurso, e Rey no a evita e puntonan dificil di Aruba. “Awe ta fiesta, pero esaki no kiermen cu nos ta sera wowo pa e temanan importante pa futuro di Aruba.” Y e Rey a sigur Aruba: “Den un mundo incierto, Aruba no ta so. Hunto nos ta keda alerta, vigilante y fuerte.”. Van der Burg a trata di trankilisa e manifestantenan, y a sigura cu tin momento amplio pa ahusta e ley. Potret cortesia ANP.