Analisis: Etiqueta di bistimento na restaurantnan na Aruba – unda libertad ta topa clase y experiencia

Scirbi pa Tito Laclé

E siman aki un otro post riba un red social a hala mi atencion. Y esaki ta pasobra e tema a toca loke hopi hende na Aruba ta pensa, pero no tur ta bisa. E tema ta simpel: Con nos ta bisti ora nos bay restaurant of un otro lugar y con esaki ta wordo ‘daña’ awendia Laga mi splica mi mes. Bo ta bay sali cu bo pareha, casa, of famia, sea pa un restaurant (mas parti), y bo ta bay netchi bisti, pasobra e ta algo special pa bo y bo famia. Y ora cu bo yega, y sinta na e lugar elegante, bo ta encontra hende (mayoria ta turista) bisti con cu ta, short, tshirt, tank top, y slof. Bo ta sinti bo ofendi, y e momento special a bay.  E punto ta uno real y hopi hende ta sintie, aunque no tur hende ta expresa esaki abiertamente. E tema no ta solamente tocante bistimento. Actualmente, e ta un discusion tocante respet  pa espacio, atmosfera, experiencia y balornan cu un establecimiento kier proyecta. Y na Aruba, unda turismo ta manda hopi, e tema aki ta bira aun mas sensitivo, pasobra negoshi ta move entre dos presion: haci cliente sinti comodo y mantene nivel, clase y identidad.

FOR DI UNDNA E FRUSTRACION TA BINI  ?

Ora e persona of pareha haci e esfuerso pa bisti netchi pa un cena, nan no ta haciendo esaki solamente pa nan “mira bon”. Nan ta drentrando den un cierto estado mental: un salida  special, un anochi cu tin balor special, un ambiente cu mester acompaña e momento. Ora nan yega y nan mira otro clientenan bisti manera si nan a drenta un snack of fast food, e contraste ey por dal e sensacion cu e experiencia a wordo kibra. P’esey, e irritation no ta semper pa e short of e slof mes. E irritation ta pa e hecho cu e lugar no ta manda un linea cla di kiko e ta y e cliente cu a haci esfuerzo ta sinti cu su esfuerzo no ta wordo respeta, pero tambe cu e negocio ta mustra cu benta ta subi ariba atmosfera.

E OTRO BANDA: E ARGUMENTO DI “MI BISTIMENTO NO MESTER INFLUENCIABO”

E argumento aki tin algo di berdad den dje. Den principio, un hende mester por bisti con cu e kier, sigur contal e ta decente y dentro di e norma ‘basico’. Pero den practica, bistimenta si ta influencia e ambiente. Mescos cu bo no ta pone musica di club na un funeral, y tampoco bo no ta papia duro den un biblioteca, tambe bistimento  ta forma parti di e “codigo social” di un lugar. Es decir: E no ta solamente un asunto di libertad individual; E ta tambe un asunto di contexto. Libertad tin sentido, pero contexto tambe tin peso.

PAKICO ARUBA A BIRA MAS FLEXIBLE?

Tin varios motibo:

1. Turismo a domina logica comercial

Hopi negoshi a cuminza pensa: “Mihor laga hende drenta, envez di perde benta.” E miedo pa perde cliente a bira mas grandi cu deseo pa mantene standard.

2. Competencia entre restaurantnan

Si un local pone regla, pero e otro no, algun hende lo bay na e otro. P’esey algun negoshi ta haya dificil pa ta e unico cu disciplina.

3. Confusion entre ‘relaxed island vibe’ y falta di norma

Aruba ta bende su mes como paraiso, relax y comodidad. Pero e “relax” no mester nifica “sin ningun etiqueta”. Un isla por ta casual y aun asina elegancia por existi.

4. Miedo di corrigi turista

Tin un cierto inseguridad: no ofende e bisitante, no laga e persona laga un review malo, no crea friccion. Esey a hiba na un cultura di tolera casi tur cos.

KICO TA E PROBLEMA REAL?

E problema real no ta cu tin hende cu kier bisti casual. E problema real ta cu Aruba no ta defini suficientemente bon unda casual ta apropia y unda un minimo di presentacion mester conta. Si tur lugar bira “bin con cu ta”, e mercado ta perde su diferenciacion. Y ora bo perde diferenciacion, bo ta perde parti di bo producto. Un restaurant cu kier ta ‘upscale’ no por simplemente sirbi cuminda caro y spera cu e atmosfera ta forma su mes. Den e parti dos, mi lo duna sugerencia, con pa posiblemente remedia e asunto.