One Battle ta gana seis premio Oscar, pero ganador Sean Penn no tabata presente

HOLLYWOOD – E pelicula One Battle After Another a gana seis premio Oscar, pero actor Sean Penn, cu a gana premio pa Miho Actor di Reparto, no tabata presente na e ceremonia pa ricibi su premio.

“Ki un anochi!”, director Paul Thomas Anderson a exclama ora e la subi escenario diadomingo anochi pa ricibi otro Oscar. 28 aña despues cu e la wordo nomina pa prome biaha pa e pelicula Boogie Nights y despues di diescuater nominacion, e la gana anochi mes tres Oscar: pa Miho Guion, Direccion y Miho Pelicula.

Su pelicula One Battle After Another a logra e mayoria di premionan cu seis di diestres nominacion. Entre nan tabatin tambe e prome Oscar den historia pa seleccion di actornan, hunto cu premio pa Miho Montahe y Miho Actor di Reparto pa Sean Penn. E pelicula ta un comedia preto tocante un revolucionario cu ya a pasa su tempo y su yiu muher adolescente, cu ta wordo persigui pa un militar cu a perde control.

Promer cu e ceremonia a cuminsa, hopi hende tabata curioso cuanto premio e pelicula di horror Sinners lo logra, despues cu e a haya dieseis nominacion historico. Finalmente e pelicula a keda cu cuater premio, aunque entre nan tabatin e prome Oscar den historia pa un camarografo femenino. Solamente tres biaha antes un muher a wordo nomina den e categoria aki, pa prome biaha den 2018.

Ganadora Autumn Durald Arkapaw a pidi tur muhernan den salon pa para. “Sin boso tur, mi no tabata aki,” el a bisa.

Michael B. Jordan, cu a gana premio pa Miho Actor cu su rol den Sinners, tambe a recorda e actornan preto cu a bin prome cu el. “Sidney Poitier, Denzel Washington, Halle Berry, Jamie Foxx, Forest Whitaker y Will Smith. Cu mi por para entre e gigantenan aki, e grandi nan, mi antepasadonan, mi hendenan.”

Director di Sinners, Ryan Coogler, tambe no a bai cas sin premio: el a gana un Oscar pa su guion.