Shoco a drenta den neishi artificial nobo cerca scol na Savaneta

SAVANETA – Un neishi artificial pa e uil di Aruba, e shoco, cerca Colegio Sagrado Corazon na Savaneta, a wordo ocupa pa e parhanan den menos cu un siman. Asina Aruba Birdlife Conservation a informa, e organizacion cu a instala e neishi como parti di e proyecto Savaneta Barrio di Shoco. Segun e organizacion, esaki ta un exito importante pa e proyecto, cu tin como meta pa duna e uil proteha mas posibilidad pa traha neishi den barrionan residencial. E neishi artificial a wordo coloca recientemente riba tereno di e scol y pronto el a resulta atractivo pa e parhanan. Aruba Birdlife Conservation ta papia di un resultado alentador. E organizacion ta spera cu e neishi tambe por haya un rol educativo, pasobra alumnonan di e scol por conoce di cerca cu e shoco, un di e specie di parha mas caracteristico y unico di Aruba.

PROYECTO SHOCO

Segun Aruba Birdlife Conservation, e hecho cu e neishi a wordo usa tan lihe ta mustra cu neishi artificial por ta un forma efectivo pa sostene y proteha e especie. 🦉