Gobierno a anuncia multa y sancion si viola prijs di producto den canasta basico

ORANJESTAD -  Gobierno di Aruba diahuebs a informa cu lo introduci multa y sancion pa negoshinan cu ta viola e prijsnan oficial di productonan den Canasta Basico. Ministro di Finansa y Asunto Economico, Geoffrey Wever, a indica cu e medida ta parti di maneho di gobierno pa proteha consumidornan y sigura cu precio di productonan di prome necesidad ta wordo respetá.

E Canasta Basico ta consisti di 1.399 producto esencial cu prijs ta wordo determina pa gobierno. Den 2025, controlnan a mustra cu un porcentaje chikito di negoshinan tabata viola e prijsnan, y hasta awor gobierno solamente por a duna advertencianan, pasobra no tabatin base legal pa impone boet.

Cu e decreto nobo, gobierno lo por impone multa administrativo cu por yega te Afl. 25.000 pa groothandel y Afl. 12.500 pa kleinhandel pa cada violacion. Tambe lo por imponé un orden di castigo, obligando negoshinan pa coregi e situacion of paga penalidad adicional.

Gobierno ta spera cu e sistema nobo drenta na vigor den di dos kwartaal di 2026, cu meta di fortalece control di prijsnan y proteha consumidornan den Aruba.