Debe di gobierno na banconan a baha considerablemente caba den 2026

ORANJESTAD – Gobierno di Aruba a logra baha su debe na sistema bancario local de forma significativo den e ultimo añanan. Esaki ta sali na cla for di cifranan di posicion financiero di gobierno. Na 2022, e debe netto di gobierno na Centrale Bank y banco comercialnan ainda tabata 353 miyon florin Arubano. Na 2023, e cantidad ey a baha pa 234 miyon florin, y na 2024 e a baha ainda mas te poco mas cu 208 miyon florin. Durante 2025, e debe a sigui baha te casi 56 miyon florin. Na cuminsamento di 2026, e posicion a mehora ainda mas. Segun cifranan di januari, solamente 4,8 miyon florin di debe netto tabata keda.

MAS PLACA RIBA BANCO

Na mes momento, cantidad di placa di gobierno riba cuenta na Centrale Bank ta sigui crece. Na fin di 2022, gobierno tabatin poco mas cu 24 miyon florin na e cuenta ey. Na fin di 2025, e cantidad ey a subi te mas cu 247 miyon florin. Na januari 2026, e total ta casi 254 miyon florin. Tambe e cantidad total di placa cu gobierno tin deposita na banco nan den pais a crece considerablemente. Esaki a subi di casi 70 miyon florin na 2022, te casi 296 miyon florin na 2025, y mas cu 301 miyon florin na januari 2026. Cifranan ta mustra cu posicion di likides di gobierno a cambia fuertemente den e ultimo añanan. Mientras cu na 2022 gobierno ainda tabatin un posicion di debe netto considerable, awor e posicion ey practicamente a desaparece. Na mes tempo, posicion total di caha di gobierno a crece di 199,2 miyon florin na 2022, te 461,5 miyon florin na fin di 2025, y 512,5 miyon florin na januari 2026.