Aruba ta negocia cu binti compania di aviacion riba rutanan nobo

ORANJESTAD – Aruba ta busca pa realisa conexionnan di buelo nobo pa e isla. Representantenan di Aruba Airport Authority (AAA) y Aruba Tourism Authority (ATA) ta tene combersacion e siman aki cu companianan di aviacion durante e conferencia internacional di aviacion Routes Americas 2026 na Rio de Janeiro. E delegacion tin mas cu binti cita programa cu companianan di aviacion y partnernan den e sector. Durante e reunionnan ey ta mira na expansion di e red di ruta y colaboracionnan strategico nobo pa fortalece e accessibilidad internacional di Aruba ainda mas. Entre e companianan cu cual nan ta tene combersacion tin tambe airlines cu actualmente ainda no ta bula pa Aruba, manera Breeze Airways, Alaska Airlines, JetSMART y Condor.

NOMINACION PA PREMIO DI AVIACION

Durante e mes conferencia, Aruba International Airport a wordo nomina di nobo pa e Routes Americas Awards den e categoria di aeropuerto cu menos cu cinco miyon pasahero. E ganadornan di e premio lo wordo anuncia diaranson durante un reunion di network na Copacabana Palace na Rio de Janeiro. E nominacion ta sigui despues cu aeropuerto a logra atrae un cantidad record di 28 compania di aviacion durante e ultimo aña. E promedio di ocupacion di buelonan tabata rond di 90 porciento.

Segun autoridad di aeropuerto, nan ta traha tambe riba incentivo nobo pa companianan di aviacion y programanan di marketing pa desaroya ruta nobo. Ademas, conexion regional cu Latinoamerica a wordo amplia via colaboracion cu companianan manera LATAM Airlines, GOL Linhas Aéreas, Wingo y Aerolíneas Argentinas. Den 2026 aeropuerto kier tambe cera pa prome biaha un acuerdo formal di cooperacion cu un compania di aviacion, despues di tres aña di desaroyo di platformanan comun di marketing. Aruba ta wordo representa na e conferencia pa otro banda pa Jo-Anne Arends y Mary-Joan Wardlaw di Aruba Airport Authority y Sjeidy Feliciano y Jordan Schlipken Croes di Aruba Tourism Authority.