AIVD: Rusia a hack accountnan di WhatsApp y Signal di empleado di gobierno hulandes

DEN HAAG – Hackernan liga cu Rusia probablemente a logra haya informacion sensibel via accountnan di WhatsApp y Signal di empleado di gobierno Hulandes. Esaki ta segun informacion cu a wordo comunica pa media pa servicionan di inteligencia MIVD y AIVD dialuna.

Segun e servicionan di seguridad, altu funcionario publico, militar y otro empleado di gobierno ta entre e principal blanconan di e hackernan ruso, cu ta intenta haya acceso na nan accountnan di e aplicacionnan di mensahe. Tambe periodistanan por ta entre e posible blanconan.

Un vocero di Ministerio di Defensa no por bisa exacto ki tipo di informacion e hackernan ruso ta buscando. E a referi na e raportanan anual di e servicionan di seguridad.

Den e raportahe anual di MIVD di 2024, ta indica cu Hulanda ta un blanco interesante pa Rusia, entre otro cosnan pa via e papel cu Hulanda ta hunga den apoyo na Ucrania, y tambe pavia cu diferente compania technologico importante y organizacionnan internacional, manera Corte Penal Internacional, ta establece na Hulanda.