Savaneta ta bira e prome “Bario di Shoco” di Aruba

SAVANETA – Dialuna mainta, 6 maart 2026, algo special a cuminsa na Savaneta. Pa 8:00 di mainta, un total di 47 boluntario a reuni na Roly Bislick Olympic Pool. Trucknan carga cu material a yega na e sitio, hunto cu un bobcat y un team cla pa cuminsa cu trabou. Pa hopi hende cu tabata pasa, lo por a parce solamente un grupo di hende cu ta cuminsa un dia di trabou. Pero tras di e actividad tabatin un idea hopi mas grandi.

STATUS APARTE

Aruba ta celebra 40 aña Status Aparte, y 18 di maart Su Mahestad Rey Willem-Alexander di Hulanda lo bishita e isla. E Rey lo haci un bishita special na Olympic Pool. Na mes tempo, tabatin plannan pa cuminsa algo nobo na Savaneta: e prome “Bario di Shoco” di Aruba.

UN IDEA CU TABATA BIBA CABA TEMPO

E idea pa crea un Bario di Shoco tabata un deseo di David Johnson, presidente di Global Owl Project y desaroyador di e holenan artificial pa Shoco cu ya ta wordo usa na Aruba pa siete aña caba. Den e dos luna cu a pasa, ta tin conversacion riba Aruba tocante e idea aki y tabata busca e momento correcto pa cuminsa.

Un peticion a drenta pa coloca un neishi artificial di Shoco na Savaneta. Cu e bishita di Rey riba 18 di maart 2026 den bista, e momento aki a parce e tempo ideal pa tuma e prome paso.

Aruba Birdlife Conservation (ABC) den e ultimo tempo a tene consultacion cu Directie Natuur en Milieu (DNM) pa busca manera con proteha Shoco di Aruba miho. Uno di e ideanan nobo cu a sali for di e conversacionnan aki ta e concepto di Bario di Shoco. Riba lugarnan strategico, lo wordo coloca ‘neishi’ artificial cu ta ofrece Shoco lugarnan sigur pa haci nan nest. E proyecto lo consisti di varios fase. Pa awor, e enfoke tabata riba coloca algun neishi artificial promer cu e bishita real. Despues, otro pasonan lo sigui.

COOPERACION

Na mes tempo, ABC a tuma contacto cu su partnernan pa mira kico ainda por wordo realiza promer cu yegada di Rey.

SIÑA FOR DI EXPERENCIA

E mariniers hulandes na Marinierskazerne Savaneta ta sostene proteccion di Shoco desde e introduccion di neishi artificial riba Aruba. Na 2019, a coloca seis neishi artificial den e campamento. Cu paso di tempo, e neishinan aki a duna leccionnan valioso. Dos di nan a resulta ta mucho cerca di costa, y no a tene tanto exito. E otro cuatro, sinembargo, a resulta hopi productivo.

Despues di siete aña, e ‘holen’ tambe tabatin mester mantencion y renovacion.

P’esey, e prome fase di e proyecto Bario di Shoco a inclui tanto renovacion di e ‘neishi’ na kazerne di Mariniers como tambe coloca dos neishi nobo pafor di e campamento na Savaneta. Un a wordo coloca cerca di Olympic Pool, y otro riba tereno di un scol.

PROME PASONAN DI UN IDEA MAS GRANDI

Den e lunanan cu ta bini, Savaneta lo wordo evalua mas a fondo pa identifica lugarnan adicional pa neishi den futuro.

Como e prome Bario di Shoco, Savaneta lo yuda mustra con e idea aki por wordo aplica tambe den otro bario riba e isla.

E paso nobo aki ta sigui otro iniciativa di proteccion di Shoco cu ya ta existi, manera Tierra del Sol-Iberostar National Shoco Conservation Sanctuary, Shoco Boulevard na JOIA-Iberostar, Shoco Garden na Marriott, y colocacion di holen na International School Aruba.

.