- Hulanda a bin di patras y gana Nicaragua 4-3 den un final dramatico den World Baseball Classic 2026
- Aruba ta conoce su di 4 morto den trafico pa 2026
- Venezuela a logra un victoria di 6-2 contra Hulanda den e World Baseball Classic 2026
- Van der Burg: No ta sostene idea di Eman pa cambia debe di Covid den fondo di inversion
- Vd Burg: No ta dispuesto pa 'cambia' e version actual di HOFA
Minister Wever ta lansa maneho pa empresarionan y exportadonan local
ORANJESTAD - Minister di Finansa mr. Geoffrey Wever, a presenta oficialmente e Maneho pa Empresarionan (Entrepreneurs Policy) y e Maneho pa Exportadonan (Export Policy). E dos manehonan aki ta forma un cuadro strategico integra cu lo acelera diversificacion economico, fortalece competitividad y amplia participacion di companianan local den mercado internacional.
Un economia resistente mester ta basa riba mas di un solo pilar. Cu e Entrepreneurs Policy y Export Policy, Gobierno ta crea un fundeshi solido pa mas iniciativa local, mas crecemento y mas presencia internacional di nos empresarionan. Negoshinan chikito y mediano (SMEs) ta representa 96% di negoshinan activo na Aruba, ta genera 42% di empleo den sector priva y 36% di salario na nos pais. E Maneho pa Empresarionan ta establece un roadmap cla pa elimina obstaculonan, simplifica proceso y stimula iniciativa comercial riba henter e isla. E maneho ta enfoca riba fortalecemento di educacion y entrenamento pa empresarionan y empleadonan, adaptacion na cambio tecnologico, simplificacion di proceso administrativo, reduccion di carga reglamentario, mehora acceso na financiamento y refuerso di servicio di sosten y desaroyo empresarial. E meta ta pa crea un clima di hasi negoshi mas eficiente, accesibel y competitivo, unda SMEs por crece y amplia nan impacto economico.
Paralelamente, e Maneho pa Exportadonan ta dirigi riba un meta strategico concreto: diversifica e economia di Aruba fuera di turismo y converti exportacion den un growth pathway mas accesibel pa mas negoshinan local. E maneho ta reconoce cu Aruba mester amplia e cantidad y diversidad di empresanan cu ta exporta producto y servicio, particularmente SMEs cu tin potencial pa drenta mercadonan regional y global. Pa logra esaki, Gobierno lo cultiva un cultura pro-export, fortalece sosten institucional pa exportadonan nobo y exportadonan den etapa tempran, reduci gasto, riesgo y bareranan practico, y mehora coordinacion y claridad den proceso di exportacion. Atencion especial lo wordo duna na exportacion di servicio y actividatnan digital, como oportunidad real pa diversificacion economico.
“No por depende solamente di un sector. Exportacion mester bira un growth pathway real pa mas negoshinan local. Esaki ta parti di nos vision pa un Aruba mas diversifica, mas innovador y menos vulnerabel,” asina Minister Wever a expresa.
E dos manehonan aki ta integra den un strategia economico mas amplio cu ta inclui maneho fiscal pa desaroyo di Oranjestad y San Nicolas, ahustenan den acuerdo pa starters, modificacion den trato fiscal di beneficionan secundario di empleo y decreto nacional tocante actividadnan di servicio permiti den zona liber. Implementacion lo wordo ehecuta door di colaboracion estrecho entre ministerio, partnernan institucional y sector priva, cu enfasis riba coordinacion, comunicacion y revision periodico pa garantisa progreso y resultado concreto.
E Entrepreneurs Policy y Export Policy ta publica riba varios lugar online,
E Entrepreneurs Policy y Export Policy lo wordo publica riba e website di Directie Economische Zaken (www.deaci.aw ), IDEA (www.idea.aw ), Exprodesk (www.exprodesk.com).
Rotonde dilanti Cas di Cultura ilumina color patriotico den marco di celebracion nacional
ORANJESTAD - En conexion cu e celebracion di 40 aña di Status Aparte y 50 aña di Himno y Bandera di Aruba, e rotonde conoci como “Las Americas”, situa riba e ruta entre aeropuerto y e area hotelero, a wordo ilumina cu luz blauw como simbolo di orgullo nacional y union.
Partido MEP kier ruenion cu minister Wever relaciona cu guera na Medio Oriente
ORANJESTAD – "Aruba mester tin transparencia y un plan concreto. Nos no por permiti pa e tensionnan na Medio Oriente afecta e cartera di nos famianan sin cu tin un strategia pa wanta e sla," Evelyn Wever-Croes, lider di Fraccion di MEP a declara despues di a entrega un peticion oficial pa un reunion urgente cu Minister Geoffrey Wever.
Parlamentonan di islanan CAS ta lanta comite riba conflicto den Reino hulandes
WILLEMSTAD/ ORANJESTAD – Parlamentonan di Aruba, Corsou y Sint Maarten a establece un asina yama petit comite cu lo ocupa su mes cu e reglamento pa conflicto den Reino Hulandes. E prome reunion di e grupo di trabou ta programa pa 19 maart na Aruba. Establecemento di e comite a wordo confirma durante un consulta tripartito di e parlamentonan riba 23 februari na Aruba. E petit comite lo ricibi e tarea pa discuti y contesta preguntanan di Staten di Corsou acerca di e proposicion di ley di Reino pa trata conflicto den Reino. Den e comite lo tin parlamentario di e tres pais. Na nomber di Aruba ta participa Edgard Vrolijk y John Hart. Corsou ta wordo representa door di Quincy Girigori y Ramon Yung, mientras Sint Maarten ta wordo representa door di Egbert Doran y Sarah Wescot-Williams. E grupo di trabou lo presenta un raportahe na e consulta tripartito di parlamentonan. Tambe lo wordo warda un conseho di Raad van State prome cu algun proposicion concreto pa cambia e ley di Reino wordo presenta. E prome reunion di e petit comite lo tuma lugar 19 maart pa dies’or di mainta den sala di reunion di Staten di Aruba na Oranjestad.
Gobernador Boekhoudt a huramenta Milly Schwengle como minister plenipotenciario
ORANJESTAD -Diahuebs oficina di gobernador di Aruba a publica e potretnan di e huramentacion di Aruba su minister plenipotenciario nobo Milly Schwengle. Tabata diaranson 4 di maart ultimo manera cu Noticiacla a informa anteriormente, cu a tuma lugar un huramentacion den presencia di Gobernador di Aruba, S.E. Alfonso Boekhoudt. Señora Mildred G.M. Schwengle a huramenta como Minister Plenipotenciario na Den Haag. Henter Conseho di Minister tabata presente na e ceremonia di huramentacion.
Awor gabinete AVP-FUTURO ta completo cu su minister plenipotenciario
ORANJESTAD – Cu huramentacion di mr. M.G.M. (Mildred) Schwengle como Minister Plenipotenciario pa Hulanda, gabinete AVP-FUTURO ta completo porfin. Of manera cu gobierno a bisa ” Cu esaki, Aruba ta fortalece su representacion strategico den Reino y su presencia na Europa”.
Wever: Aruba y Curaçao ta mas cerca cu proyecto di ferry, cu destaho publico
ORANJESTAD - Ministerio di Asunto Economico y Sector Primario, mr. Geoffrey Wever, den cooperacion cu Gobierno di Curaçao, representa dor di Minister di Desaroyo Economico di Curaçao, Mr. Roderick Middelhof, a anuncia oficialmente publicacion di e “Terms of Reference” (ToR) pa contrata un consultant cu lo guia e proceso pa realisa un conexion di ferry pa pasahero entre Aruba y Corsou.
Follow NoticiaCla
