Gabinete Pisas di Corsou a prohibi director di Cas di Corsou entrada

WILLEMSTAD - E situashon na Kas di Kòrsou ta keda unu bergonsoso. Na víspera yegada di Minister Plenipotensiaro interino den persona di sr. Errold Bishop, ayera gabinete Pisas ta prohibí e direktor di Kas di Kòrsou. Den un karta fechá 1e di mart, pero ta ayera 2 di mart numa e direktor di Kas di Kòrsou, sra. Martha Semil, ta haña esaki, gabinete Pisas ta informá e direktor pa entregá yabi i tur material ku e tin di Kas di Kòrsou.

Semil a bira direktor interino na Kas di Kòrsou na momentu ku Manuel a baha komo minister plenipotensiario dia 12 di yanüari último. Semil mester a sigui manehá Kas di Kòrsou. Segun promé minister Pisas bou di kende Kas di Kòrsou ta kai, e akusashonnan ku tin kontra di Manuel ta kontra di Semil tambe. P’esei ta imposibel pa por sigui mantené den tal funshon. Tambe tin duda den su maneho finansiero.

Tambe Pisas a indiká den e karta ku entre tantu un sra. M. Bernadina a bai Kas di Kòrsou pa atendé e situashon kaótiko ku tin. A pidi Semil pa kooperá ku Bernadina pa dun’é tur informashon i dokumento ku e pidi. Segun gobièrnu, Semil no ta kooperando pa entregá dokumentonan na Bernadina. Su aktuashon ta kontra di LMA.

Teniendo kuenta ku tur puntonan tresé dilanti, entrante ayera 2 di mart 2026 a prohibí Semil entrada na Kas di Kòrsou. Hasta e tin di bandoná Kas di Kòrsou kaminda e lo ta kedando den tal funshon. E prohibishon ta drenta na vigor ayera 2 di mart i ta terminá dia 31 di mart próksimo. P’esei tambe Semil tin di entregá tur material ku e tin di Kas di Kòrsou i bandoná esaki. Tambe ta bisa Semil ku esaki no ta un kastigu disiplinario, pero un medida di órden.

E desishon akí a na vispera di huramentashon di sr. Errold Bishop komo Minister Plenipotensiaro interino, mañan 4 di mart 2026, serka Gobernador. Bishop ta bai okupá e puesto di Carlson Manuel ku na yanüari di e aña aki a keda suspendé di su funshon komo minister Plenipotensiario. Esaki debí na un denunsia di un trahadó na Kas di Kòrsou kontra Manuel. Tambe den desèmber 2025, parlamento den su totalidat a bai di akuerdo ku un moshon pa investigá maneho finansiero di Kas di Kòrsou i e Minister Plenipotensiario Manuel.

No mas ku dia 13 di febrüari promé minister Pisas a anunsiá den parlamento ku ta bai reorganisá representashon na Kas di Kòrsou, i awor otro situashon fèrfelu a presentá. NOTA: E texto ta scirbi den papiamento fonetico di Corsou.