ANALISIS: 40 aña despues, Aruba ainda ta lucha cu ley — retraso legislativo ta mina gobernansa

Scirbi pa Tito Laclé

E dato cu mas a salta for di informe anual di Raad van Advies no ta un dato tecnico, sino un señal politico profundo: Aruba ta produci cada bez menos ley. Na 2015 ainda tabatin 53 diseño di ley den proseso. Na 2025: solamente 24. Pa un pais cu desafio structural grandi — economico, social, institucional — esaki no ta un señal di madurez, sino di estancamento.

Pero e problema no ta solamente cantidad. Ta tempo. Hopi di e ley cu e pais mester hopi — modernisacion di privacidad, reforma di educacion y trabou, gobernansa corporativo, derecho administrativo — ta pasa añanan den preparacion sin yega Parlamento of sin drenta na vigor despues di aprobacion. Resultado: Aruba tin ley cu no ta actualisa, institucion cu ta opera cu marco legal viejo, y reforma cu ta keda riba papel.

LEY TA BASE DI GOBERNANSA

Sin ley actualisa, ningun estado moderno no por funciona bon. Legislacion ta e arkitectura di gobernansa: e ta defini responsabilidad, limita poder, y crea confianza. Ora cu un proceso legislativo bira lento y impredecibel, e pais completo ta perde efectividad.

Raad van Advies ta bisa cla : e retraso persistente ta  menaza credibilidad di e sistema. Esaki ta un advertencia serio. Credibilidad legal no ta algo abstracto — e ta determina con inversionista, ciudadano y institucionnan ta mira e pais. Un pais cu no logra modernisa su propio ley pa decenio, ta manda un señal di debilidad institucional.

POLITISACION DI CONSEHO INDEPENDIENTE

E informe tambe ta revela un tendencia preocupante: politisacion di e rol di Raad van Advies. Durante discusion di ley HOFA y hasta su propio presupuesto, Parlamento a usa e Conseho como terreno di debate politico. Pa un organo constitucional independiente, esaki ta un liña peligroso.

Independencia di un asesor legal ta fundamental den un estado di derecho. Si e organo cu mester evalua ley obhetivamente bira parte di lucha politico, calidad di legislacion mes ta corre riesgo. E cuestion aki ta mas grandi cu HOFA: e ta toca e balansa entre poder politico y control institucional.

STATUS APARTE YA NO TA EXCUSA

Talbez e frase mas fuerte di informe ta esaki: Aruba ya no ta un pais hoben. Despues di 40 aña Status Aparte, estado di derecho mester ta firmemente ancla den practica politico. Si legislacion ainda ta tarda decenio, si reforma keda paralisa, si institucionnan ta opera cu ley anticua — e pregunta ta inevitabel: con solido nos sistema realmente ta?

Esaki no ta critica di un gobierno specifico. Informe ta mira un patron di decada: falta di capacidad tecnico, falta di experto, falta di planificacion legislativo realista. Esaki ta un problema structural di gobernacion.

2026: MOMENTO DI REFLEXION REAL

Aña 2026 lo wordo marca pa 40 aña Status Aparte. Celebracion lo tin, discurso lo tin. Y hopi. Pero e pregunta cu Raad van Advies ta pone ta mas profundo: Aruba a madura institucionalmente? Of nos estado di derecho ainda ta den transicion permanente?

Sin aceleracion serio di proceso legislativo — cu prioridad real, capacidad tecnico y disciplina politico — Aruba ta corre riesgo di bira un pais cu hopi politica, pero poco ley moderno. Y sin ley moderno, gobernansa moderno no ta posibel.

E advertencia di Raad ta cla: credibilidad di estado ta cuminsa cu credibilidad di su ley. Aruba tin 40 aña. Excusan di hubentud ya no ta aplica! Ojo!