Pelotero profesional di Corsou, Jonathan Schoop den libertad, pero ta keda sospechoso

WILLEMSTAD - Ayera den korte di apelashon, porta será, e tribunal di Hof a bai di akuerdo ku mr Athena Sulvaran pa posponé detenshon di  e pelotero profeshonal Jonathan Schoop . Den e kaso akí e tribunal di Hof a haña ku e situashon  personal i privá ta pisa mas  i no tin motibunan grave pa sigui ku su detenshon, pero Schoop lo keda sospechoso den e kaso akí pendiente mas investigashon.

Schoop a keda detené  den e mardugá di 28 pa 29 di yanüari último en konekshon ku arma di kandela. E detenshon  a tuma lugá na un trùk di pan riba Rooseveltweg . Polis a detené 9 persona den e kaso akí i a konfiská vários arma di kandela munishon, patronchi i lachi. Seguidamente a tene entrada hudisial tambe na kas di Schoop den bario di Santa Maria. E señora di Schoop tambe a keda detené riba e dia enkuestion , pero su detenshon a keda suspendé  dia 11 di febrüari último.

Banda di esaki 4 otro persona tambe a keda poné  den libertat den e kaso akí. Ministerio Públiko  tabata realmente kòrtiku den nan informashon relashoná  ku e kaso akí i a bisa ku ta trata aki di akshon den kuadro di ordenansa di arma di kandela i listramentu preventivo. Ainda tin 3 sospechoso detené  relashona ku e kaso akí pendiente investigashon. NOTA: Texto ta scirbi den papiamento fonetico di Corsou.